ސިޔާސީ ބާރުވެރިކަން ހޯދުމުގެ މަގްސަދުގައި ދައުލަތުގެ މާލީ ކަންކަމުގައި ސަރުކާރުން ތަކުރާރުކޮށް އިހުމާލުވަމުންދާ ކަމަށާއި، މިކަމުގެ ފުރިހަމަ ޒިންމާ ސަރުކާރުން އުފުލަންޖެހޭނެ ކަމަށް މާލޭގެ މޭޔަރުކަމަށް ވާދަކުރައްވާ އިސްމާޢިލް ޒަރިޔަންދު ވިދާޅުވެއްޖެއެވެ.

އެކްސްގައި ހިއްސާކުރެއްވި ޕޯސްޓެއްގައި ޒަރިޔަންދު ވިދާޅުވީ ސަރުކާރުން ސިޔާސީ ބާރުވެރިކަން ހޯދުމަށް ދައުލަތުގެ މާލީކަންކަމުގައި ތަކުރާރުކޮށް އިހުމާލުވެ، ބޭރުފައިސާގެ އަގު އިންތިހާއަށް އުފުލި، ބޭނުންކުރެވޭ ރިޒާވްގައި މަދު ޑޮލަރުކޮޅެއް ބަހައްޓައިގެން އުޅުމުގެ ޒިންމާ ނަގަންޖެހޭނީ ސަރުކާރުން ކަމަށެވެ.

ޒަރިޔަންދު ފާހަގަކުރެއްވި ގޮތުގައި، މި ވަގުތު ދުނިޔޭގައި ފަށާފައިވާ ހަނގުރާމަ އިތުރު 4 ހަފްތާއަށް ދެމިގެން ހިނގައްޖެނަމަ، މިހާރު 79 ޑޮލަރުގައި ހުރި ތެޔޮ ފީފާއެއްގެ އަގު 130 ޑޮލަރަށްވުރެ މައްޗަށް އުފުލިގެންދާނެއެވެ. މިފަދަ ހާލަތެއްގައި ކައްކާ ގޭސް ލިބުން ދަތިވެ، ފަތުރުވެރިން އައުން މަދުވެ، އަސާސީ މުދާ އިމްޕޯޓް ކުރުމަށް ބޭނުންވާ މިންވަރަށް ބޭރު ފައިސާ ނެތިދާނެ ކަމުގެ ކަންބޮޑުވުން އޭނާ ފާޅުކުރެއްވިއެވެ.

ރާއްޖޭގެ ދަރަނީގެ ބުރައަށް އަލިއަޅުއްވާލައްވަމުން ޒަރިޔަންދު ވިދާޅުވީ، 2026 ވަނަ އަހަރުގެ އެޕްރިލް މަހު ދަރަނި އަދާކުރުމަށް 630 މިލިއަން ޑޮލަރު ދައްކަންޖެހޭ ކަމަށެވެ. މީގެ ތެރެއިން 100 މިލިއަން ޑޮލަރު ދެއްކުން ލަސްކުރެވޭތޯ އަބޫދާބީ ފަންޑުގައި އެދެމުންދާއިރު، އެންމެ ފަހުން ކާބޯތަކެއްޗާއި ތެލާއި ބޭސް އިމްޕޯޓް ކުރާނީތޯ ނުވަތަ ދަރަނި ދައްކާނީތޯ ވިސްނަންޖެހޭ ފަދަ ނުރައްކާތެރި ހާލަތަކަށް ރާއްޖެ ހިނގައިދާނެ ކަމަށް އޭނާ ލަފާކުރިއެވެ.

މީގެއިތުރުން، މި ހަނގުރާމަ ދިގުލައިދިޔުމުން ދުނިޔޭގެ އެހެނިހެން ޤައުމުތަކަށް ދިމާވާ އިޤްތިޞާދީ އުނދަގުލާއި، ރާއްޖޭގެ މޫޑީޒް ރޭޓިންގ އޮތްގޮތުން ދަރަނި ދޭފަރާތްތަކުން އިތުރު ދަރަނި ދިނުމަށް ފަސްޖެހި އިންޓަރެސްޓް ރޭޓް މަތިކުރަމުންދާކަން ޒަރިޔަންދު ފާހަގަކުރެއްވިއެވެ. އަދި ރާއްޖޭގެ ތާރީޙުގައިވެސް ނުދާފަދަ ދަށު ދަރަޖައަކަށް 2026 ވަނަ އަހަރުގެ އޯގަސްޓް މަހުގެ ކުރިން ރާއްޖޭގެ މާލީ ހާލަތު ވެއްޓިދާނެ ކަމަށްވެސް ޒަރިޔަންދު ވިދާޅުވިއެވެ.

ވެރިކަން ދެމެހެއްޓުމުގެ ނިޔަތުގައި ބޭރުގެ އިސްތިޢުމާރީ ނުފޫޒުތަކަށް ދީލާލަންޖެހި، ރާއްޖޭގެ އިސްތިޤުލާލު ނުރައްކަލުގެ ތެރެއަށް ވެއްޓުމުގެ ފުރުސަތު އޮތް ކަމަށް ޤަބޫލުކުރެވޭ ކަމަށްވެސް ޒަރިޔަންދު ވަނީ ވިދާޅުވެފައެވެ.