ކޮންގްރެސް ޕާލިމަންޓަރީ ޕާޓީގެ ރައީސާ ސޯނިއާ ގާންދީ، އީރާނުގެ ވެރިޔާ އަވަހާރަކޮށްލުމާ ގުޅިގެން އިންޑިއާ ސަރުކާރުން ހަނުހުރުމުން އެކަމަށް ވަރަށް ބޮޑަށް ފާޑުވިދާޅުވެއްޖެއެވެ.

"ދަ އިންޑިއަން އެކްސްޕްރެސް" ގައި ޝާއިއުކުރި މަޒުމޫނެއްގައި ސޯނިއާ ވިދާޅުވީ، ސުލްހައިގެ މަޝްވަރާތައް ކުރިއަށްދަނިކޮށް ގައުމެއްގެ އިސްވެރިއަކު އަވަހާރަކޮށްލުމަކީ ބައިނަލްއަގުވާމީ ގުޅުންތަކަށް ލިބުނު ވަރަށް ބޮޑު ހީނަރުކަމެއް ކަމަށެވެ.

ސޯނިއާ ގާންދީ އިތުރަށް ފާހަގަކުރެއްވި ގޮތުގައި، މި ހާދިސާގެ ސަބަބުން ލިބުނު ކުއްލި ސިހުމަށްވުރެވެސް ބޮޑަށް ފާހަގަކުރެވެނީ މިކަމުގައި އިންޑިއާ ސަރުކާރުން ގެންގުޅޭ ހަނުހުރުމުގެ ސިޔާސަތެވެ.

އޭނާ ވިދާޅުވި ގޮތުގައި މިއީ ވަކި ފަރާތަކަށް ނުޖެހުން ނޫން ކަމަށާއި، މިއީ ގައުމުގެ ޒިންމާތަކުން ރެކުން ކަމަށް ބެލެވޭ ކަމަށެވެ. އަދި ބައިނަލްއަގުވާމީ ގާނޫނުތަކާއި ގައުމުތަކުގެ މިނިވަންކަމަށް އިހުތިރާމް ކުރުމުގެ ބަދަލުގައި، މިފަދަ ހަމަލާތަކާ މެދު ބަހެއް ނުބުނުމަކީ އިންޑިއާގެ ހާރިޖީ ސިޔާސަތުގެ އިތުބާރާ މެދު ސުވާލު އުފެދޭ ކަމެއް ކަމަށްވެސް އޭނާ ވިދާޅުވިއެވެ.