މެދުއިރުމަތީގެ މަސްރަޙު ހޫނުވެ، އީރާނާއި އިސްރާއީލާ ދެމެދު އުފެދުނު ފިތުނަތައް ފާޅުކަން ބޮޑު ކުރިމަތިލުމަކަށް ބަދަލުވުމާއެކު، ގަލްފުގެ ގިނަ ޤައުމުތަކަކަށް ވަނީ ނުތަނަވަސްކަން ކުރިމަތިވެފައެވެ. ދުބާއީ އާއި ދޯހާ ފަދަ ސަރަޙައްދީ މުހިންމު ރަށްތަކުގައި ވައިގެ ދިފާޢީ ނިޒާމުތައް އެކްޓިވޭޓް ކުރަން މަޖުބޫރުވީ، އެމެރިކާ އާއި އިސްރާއީލު ގުޅިގެން އީރާނަށް ދިން ހަމަލާތަކުގެ ބަދަލު ހިފުމުގެ ގޮތުން، އެ ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން އަމާޒުކުރަން ފެށުމުންނެވެ. ނަމަވެސް، މި ނުރައްކާތެރި އަލިފާންގަނޑުގެ ތެރޭގައިވެސް އޮމާން ފެނިގެންދިޔައީ ސަލާމަތުގެ އައްސޭރިއެއްގައި އޮތް ހަމައެކަނި ޤައުމުގެ ގޮތުގައެވެ.

އޮމާން މި ނުރައްކާތެރި ދަނޑިވަޅުން ސަލާމަތްވުމުގެ ފަހަތުގައި އޮތީ އެ ޤައުމުން ޒަމާނުއްސުރެ ގެންގުޅެމުންދާ ހަރުދަނާ އަދި ދުރުވިސްނޭ ޚާރިޖީ ސިޔާސަތެވެ. ގަލްފް ކޯޕަރޭޝަން ކައުންސިލް (ޖީ.ސީ.ސީ) ގެ މެންބަރަކަށް ވީނަމަވެސް، މަސްކަޓުން ވަނީ ތެހެރާނާ ދެކޮޅަށް ހަރުކަށި ސްޓޭންޑެއް ނެގުމުން ދުރުހެލިވެފައެވެ. އޭގެ ބަދަލުގައި އޮމާނުން އިޚްތިޔާރުކުރީ އީރާނާއެކު ހުޅުވާލެވިފައިވާ ޑިޕްލޮމެޓިކް މުޢާމަލާތްތައް ދަމަހައްޓަމުން، ހުޅަނގުގެ ބައިވެރިންނާ އޮންނަ ގުޅުންވެސް އެއްވަރެއްގައި ހިފެހެއްޓުމަށެވެ.

ފާއިތުވި ފެބްރުއަރީ މަހުގެ ތެރޭގައި މެދުއިރުމަތީގެ މަސްރަޙު ގޯސްވެގެން ދިޔައިރު، ބައެއް އިސްލާމީ ޤައުމުތަކުގެ ވެރިންގެ ފަރާތުން ފެނިގެންދިޔައީ ވަރަށް ފިނޑި އަމަލުތަކެކެވެ. އިސްލާމީ ޤައުމަކަށް ޔަހޫދީން އަރައިގަނެ، އެ ޤައުމުގެ އިސްލާމީ ލީޑަރެއް އަވަހާރަކޮށްލިއިރުވެސް، އެކަމަށް އެކަށީގެންވާ ރައްދެއް ދިނުމުގައި ގިނަ ޤައުމުތަކެއް ވަނީ ނުކުޅެދިފައެވެ. ދުނިޔޭގެ ބޮޑެތި ބާރުތަކުން ބައެއް ކަންކަމުގައި އަވަސް ރައްދުތައް ދިން ނަމަވެސް، އިސްލާމީ އުންމަތުގެ މިފަދަ ބޮޑެތި ހާދިސާތަކުގައި ބައެއް ވެރިން ބުއްދީގެ ބޭނުންކުރުމުގައި ފެއިލްވެފައިވާކަން ފާހަގަކުރެވެއެވެ.

އޮމާނާއި އީރާނުގެ ގުޅުމަކީ މިއަދު އުފެދުނު ގުޅުމެއް ނޫނެވެ. މި ގުޅުމުގެ ބިންގާ އެޅިފައިވަނީ 1970 ގެ އަހަރުތަކުގައެވެ. އެއީ ދޮފަރު ބާޣީންގެ ހަރަކާތްތައް ހުއްޓުވުމުގައި އީރާނުން ސުލްޠާން ޤާބޫސް ބިން ސަޢީދަށް ފުރިހަމަ ތާއީދު ދިން ދުވަސްވަރެވެ. 1979 ގެ އީރާނު އިންޤިލާބަށްފަހު ގިނަ ޤައުމުތަކުން އީރާނާ ގުޅުން ކަނޑާލި ނަމަވެސް، އޮމާނުން އިޚްތިޔާރުކުރީ އެކުވެރިކަން ކުރިއަށް ގެންދިއުމަށެވެ.

އޮމާނުން އަދާކުރާ މެދުވެރިއެއްގެ ދައުރަކީ ސަރަޙައްދީ ހަމަޖެހުމަށް ލިބޭ ވަރަށް ބޮޑު ބާރެކެވެ. ޚާއްޞަކޮށް 2015 ވަނަ އަހަރުގެ ނިއުކްލިއާ އެއްބަސްވުމަށް މަގުފަހިކުރުމަށް އީރާނާއި އެމެރިކާއާ ދެމެދު ސިއްރު މަޝްވަރާތައް ބޭއްވުމުގައި އޮމާން މުހިންމު ދައުރެއް އަދާކުރިއެވެ. މީގެ އިތުރުން، ދުނިޔޭގެ ތެލުގެ ވިޔަފާރީގެ އެންމެ މުހިންމު ދޮރާށި ކަމަށްވާ "ސްޓްރޭޓް އޮފް ހޮރްމޫޒް" ބެލެހެއްޓުމުގައި ދެ ޤައުމުން ގުޅިގެން މަސައްކަތްކުރެއެވެ. މި ސަރަޙައްދުގެ ހަމަޖެހުމަކީ ދެ ޤައުމުގެ އިޤްތިޞާދީ އަދި ވިޔަފާރީގެ މަސްލަހަތާ ސީދާ ގުޅިފައިވާ ކަމެކެވެ.

އީރާނާ ދެކޮޅަށް ބޭރުގެ އަސްކަރީ މަރުކަޒުތަކަށް ޖާގަދީ، ފާޅުގައި އީރާނާ ކުރިމަތިލާ އަވަށްޓެރި ޤައުމުތަކާ ޚިލާފަށް، އޮމާނުން ގެންގުޅޭ "ދުރުހެލިވުމުގެ" ސިޔާސަތަކީ އެ ޤައުމަށް ލިބުނު ބޮޑު ރައްކާތެރިކަމެކެވެ. މިކަމުން ހާމަވަނީ ބައިނަލްއަޤުވާމީ ސިޔާސީ ކަނޑުގައި ދަތުރުކުރާއިރު، ބުއްދިވެރިކަމާއެކު ހަމަހަމަ ސިޔާސަތެއް ގެންގުޅުމަކީ ހަނގުރާމައިގެ އަލިފާނުން ސަލާމަތްވުމަށް އޮތް އެންމެ ކުރު މަގުކަމެވެ. އޮމާނުން މިވަނީ އެކަން ދުނިޔެއަށް ސާބިތުކޮށްދީފައެވެ.