އެމެރިކާއާއި އިޒްރޭލުން އީރާނަށް އިސްވެ ޙަމަލާދޭން ފެށުމާ ގުޅިގެން، ދުނިޔޭގެ ދަތުރުފަތުރުގެ ސިނާއަތަށް ބޮޑެތި ގޮންޖެހުންތަކެއް ކުރިމަތިވެ، އެއާލައިންތަކުގެ މަސައްކަތްތަކަށް ބޮޑު ހުއްޓުމެއް އަތުވެއްޖެއެވެ. މިދިޔަ ހޮނިހިރު ދުވަހު އެމެރިކާ އާއި އިސްރާއީލުން ގުޅިގެން އީރާނާ ދެކޮޅަށް ދިން އަސްކަރީ ހަމަލާތަކާ ގުޅިގެން، ހޯމަ ދުވަހު ބާޒާރުގައި ޓްރެވަލް ސްޓޮކްތަކުގެ އަގު ވަނީ ވަރަށް ބޮޑަށް ދަށަށް ގޮސްފައެވެ.

މި ހަމަލާތަކުގެ ރައްދުގައި އީރާނުން ވަނީ ވަރުގަދަ ފިޔަވަޅުތަކެއް އަޅާފައެވެ. ރިޕޯޓްތައް ބުނާގޮތުން އީރާނުން ވަނީ މިސައިލާއި ޑްރޯން ބޭނުންކޮށްގެން ދުބާއީ، އަބޫދާބީ، ގަތަރު އަދި ބަހްރެއިންގައި ހުންނަ އެމެރިކާ އާއި އިޒްރޭލުގެ އަސްކަރީ މަރުކަޒު ތަކަށް އަމާޒުކޮށް ހަމަލާތަކެއް ދީފައެވެ. ވޯލް ސްޓްރީޓް ޖާނަލް އިން ރިޕޯޓްކޮށްފައިވާ ގޮތުގައި، އީރާނުގެ މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ އެއާޕޯޓްތަކާއި، ސީޕޯޓްތަކާއި އަދި އެހެނިހެން މުހިންމު އިންފްރާސްޓްރަކްޗަރތަކަށެވެ.

މި ހަމަލާތަކުގެ ސަބަބުން އެންމެ ބޮޑު ނޭދެވޭ އަސަރެއް ކުރީ ވައިގެ ދަތުރުފަތުރަށެވެ. އެގޮތުން ވައިގެ ދިފާޢީ ނިޒާމު ބޭނުންކޮށް ވައްޓާލި ޑްރޯން ތަކުގެ ބައިތައް ޔުނައިޓެޑް އަރަބް އެމިރޭޓްސްގެ މައި ދެ އެއާޕޯޓް ކަމަށްވާ ދުބާއީ އާއި އަބޫދާބީ އެއާޕޯޓަށް ވެއްޓުމުގެ ސަބަބުން އެމިރޭޓްސް އާއި އިއްތިހާދު އެއާލައިންގެ އޮޕަރޭޝަންތަކަށް ވަނީ ބުރޫއަރާފައެވެ. މީގެ އިތުރުން، ދުބާއީގެ ބައެއް ހޮޓާތަކަށާއި ބަހްރެއިންގެ ރެސިޑެންޝަލް ޓަވަރުތަކަށް ވެސް ވައިގެ ތެރޭގައި ގޮއްވާލި ޑްރޯންތަކުގެ ބައިތަށް ވެއްޓިފައިިވާ ކަމަށް ރިޕޯޓްތައް ބުނެއެވެ.

ފްލައިޓްރެޑާ24 ގެ ތަފާސްހިސާބުތަކަށް ބަލާއިރު، މި ހަމަލާތަކާ ގުޅިގެން މެދުއިރުމަތީގެ ހަތް އެއާޕޯޓަކުން ހުކުރު ދުވަހު އެކަނިވެސް 3،400 އަށް ވުރެ ގިނަ ފްލައިޓް ވަނީ ކެންސަލްކޮށްފައެވެ. މީގެ ތެރޭގައި ދުބާއީ އިންޓަނޭޝަނަލް އެއާޕޯޓަށް އަންނަން އޮތް ފްލައިޓްތަކުގެ 98 އިންސައްތަ އަދި ގަތަރުގެ ހަމަދު އިންޓަނޭޝަނަލް އެއާޕޯޓަށް އަންނަން އޮތް ފްލައިޓްތަކުގެ 79 އިންސައްތަ ވަނީ ކެންސަލްކޮށްފައެވެ.

މި ހާލަތު އިތުރަށް ގޯސްވެ، ހޯމަ ދުވަހުގެ ވަގުތާ ހަމައަށް ދުބާއީ އެއާޕޯޓުގެ 1،165 އަށް ވުރެ ގިނަ ފްލައިޓް ކެންސަލް ކުރެވުނުއިރު، ދޯހާ، އަބޫދާބީ އަދި ޓެލްއަވީވްގެ އެއާޕޯޓްތަކުގެ ދަތުރުތަކުގެ ދެބައިކުޅަ އެއްބައި ވަނީ މެދުކަނޑާލާފައެވެ. ފްލައިޓްރެޑާ24 ގެ ޗާޓުން ފެންނަ ގޮތުގައި، ސަލާމަތީ ސަބަބުތަކަށްޓަކައި އަފްޣާނިސްތާން، އީރާން، އިރާގު، ޔޫއޭއީ، ކުވައިތު، ޖޯޑަން، ސީރިއާ އަދި އިސްރާއީލުގެ ވައިގެ ސަރަހައްދު ވަނީ ބަންދުކޮށްފައެވެ. މިއީ މެދުއިރުމަތީގެ ވައިގެ ދަތުރުފަތުރަށް ފަހުގެ ތާރީޚެއްގައި އައި އެންމެ ބޮޑު ހުއްޓުމެވެ.