މި ރަމަޟާން މަހު ބާޒާރުގައި އޮރެންޖުގެ އަގު އިންތިހާއަށް އުފުލިގެން ދިޔައީ ސަރަހައްދީ ޕޯޓްތަކާއި ސަޕްލަޔަރުންގެ މައްސަލަތަކެއްގެ ސަބަބުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު ސައީދު ވިދާޅުވީ، އޮރެންޖުގެ އަގު އުފުލެން ދިމާވީ ސަރަހައްދީ ގޮތުން އޮރެންޖް ސަޕްލައިކުރާ ބައެއް ޕޯޓުތަކުގައި އުފެދުނު ބޮޑު ޑިމާންޑާ އެއްވަރަށް މުދާ ފޯރުކޮށްދިނުމުގައި ހުރި ހުރަސްތަކެއް ނުވަތަ "ކްލޮގް" ތަކެއްގެ ސަބަބުން ކަމަށެވެ. އަދި މުދާ ސޯސްކުރާ މާކެޓުގައި ވެސް ބައެއް ގޮންޖެހުންތައް ހުރިކަން މިނިސްޓަރު ފާހަގަކުރެއްވިއެވެ.

"މިފަހަރު އޮރެންޖަށް އެކަން ދިމާވީ. ޕްރައިވެޓް ސެލަރސްގައި ތަފާތު އަގުތަކެއް ހުރެދާނެ." މިނިސްޓަރު ވިދާޅުވިއެވެ.

މި ރަމަޟާން މަސް ފެށުމުގެ ތިން ހަފްތާ ކުރިން ބާޒާރުގައި އޮރެންޖުގެ އަގު އުފުލެން ފަށާފައިވާއިރު، މަސް ފެށުނުއިރު އޮރެންޖެއްގެ އަގު ވަނީ 12 ރުފިޔާ އާއި 16 ރުފިޔާ އާ ދެމެދުގެ އަގަކަށް އުފުލިފައެވެ. އާންމު ގޮތެއްގައި ބާޒާރުގައި އޮރެންޖެއް ލިބެން ހުންނަނީ 3 ރުފިޔާ އާއި 6 ރުފިޔާ އާ ދެމެދުގެ އަގަކަށެވެ.

އޭގެއިތުރަށް މިނިސްޓަރު ވިދާޅުވީ، ހަމައެކަނި ހަނޑޫ، ހަކުރު އަދި ފުށް ލިބުމުން ސަރުކާރުގެ ޒިންމާ ނިމުނީ ކަމަށް އޮތް އޮތުން ބަދަލުކުރުމަށް މަސައްކަތް ކުރައްވާފައިވާނެ ކަމަށެވެ. އެގޮތުން، 10 ބާވަތެއްގެ މޭވާއާއި ތަރުކާރީގެ އިތުރުން އެންމެ ބޮޑަށް ބޭނުންކުރާ 3 ބާވަތުގެ ކާނާ ހިމެނޭހެން ޖުމްލަ 23 ބާވަތެއް އަސާސީ ކާބޯތަކެތީގެ ގޮތުގައި ކަނޑައަޅާފައިވާ ކަމަށް ސައީދު ވިދާޅުވިއެވެ.

އޮރެންޖު ހިމެނޭހެން މި ބާވަތްތައް އެސްޓީއޯ މެދުވެރިކޮށް ހެޔޮ އަގުގައި ފޯރުކޮށްދޭނެ ކަމަށް ސަރުކާރުން ހާމަކޮށްފައިވާއިރު، މި ތަކެތި ބާޒާރުގައި ލިބޭ އެންމެ ހެޔޮ އަގުގައި ރައްޔިތުންނަށް ފޯރުކޮށްދިނުމަށް އިންތިޒާމުތައް ހަމަޖައްސަމުންދާ ކަމުގެ ޔަގީންކަން ވެސް މިނިސްޓަރު މިއަދު ވަނީ ދެއްވާފައެވެ.