އީރާނުން ނިއުކްލިޔަރ ހަތިޔާރު އުފެއްދުމަށް ރޭވުންތެރި މަޝްރޫޢެއް ހިންގަމުންދާ ކަމުގެ ހެއްކެއް ފެންނަން ނެތް ކަމަށް ބައިނަލްއަޤުވާމީ އެޓޮމިކް ހަކަތައާ ބެހޭ އިދާރާ (އައިއޭއީއޭ) އިން ހާމަކޮށްފިއެވެ.

އެ އިދާރާގެ އިސްވެރިޔާ ރަފައެލް ގްރޮސީ ވިދާޅުވީ، އެމެރިކާއާއި އިސްރާއީލުން ތުހުމަތު ކުރި ނަމަވެސް، އީރާނުން ބޮމެއް ތައްޔާރުކުރަން އުޅޭކަމަށް ނިންމޭނެ ފަދަ ހެކިތަކެއް އަދި ފެނިފައި ނުވާ ކަމަށެވެ.

ނަމަވެސް، އީރާނުން 60 އިންސައްތައަށް ޔުރޭނިއަމް މުއްސަނދިކޮށްފައިވާތީ އެކަމާ މެދު އައިއޭއީއޭއިން ވަނީ ކަންބޮޑުވުން ފާޅުކޮށްފައެވެ. މިހާ މަތީ މިންވަރަކަށް ޔުރޭނިއަމް މުއްސަނދި ކުރަނީ އާންމުކޮށް ނިއުކްލިޔަރ ހަތިޔާރު ގެންގުޅޭ ޤައުމުތަކުންކަމަށް ގްރޮސީ ވަނީ ވިދާޅުވެފައެވެ. އަދި އީރާނުން މިހާރު ޖަމާކޮށްފައިވާ ޔުރޭނިއަމްއަކީ ދިހަޔަކަށް ވުރެ ގިނަ ނިއުކްލިޔަރ ވޯހެޑް އުފެއްދޭނެ މިންވަރެއް ކަމަށް ވެސް އޭނާ ވަނީ ފާހަގަކުރައްވާފައެވެ.

2015 ވަނަ އަހަރުގެ ނިއުކްލިޔަރ އެއްބަސްވުމުން 2018 ގައި އެމެރިކާ ވަކިވުމާ ގުޅިގެން، އީރާނުން ވަނީ އެއްބަސްވުމުގައި ކަނޑައަޅާފައިވާ 3.67 އިންސައްތައަށް ވުރެ މަތިން ޔުރޭނިއަމް މުއްސަނދި ކުރަން ފަށާފައެވެ. މިހާރު އީރާނުން ޔުރޭނިއަމް މުއްސަނދި ކުރާ 60 އިންސައްތައަކީ ހަތިޔާރު އުފެއްދުމަށް ބޭނުންވާ 90 އިންސައްތައާ ވަރަށް ގާތް މިންވަރެކެވެ. އީރާނުން އެ ޤައުމުގެ ޔުރޭނިއަމް މަޝްރޫޢަކީ ސުލްހަވެރި މަޝްރޫޢެއް ކަމަށް ބުނި ނަމަވެސް، ހުޅަނގުގެ ބާރުތަކުން އެކަން ޤަބޫލެއް ނުކުރެއެވެ.