އީރާނުގެ ކަނޑުގެ ސިފައިންގެ ބޮޑު އަސްކަރީ މަނަވަރެއް ސްރީލަންކާގެ ކަނޑުގެ ސަރަޙައްދަށް ފައްތާލުމާ ގުޅިގެން، އެ ގައުމުގެ އަސްކަރިއްޔާއިން އިސްނަގައިގެން މީހުން ސަލާމަތްކުރުމުގެ ބޮޑު އޮޕަރޭޝަނެއް ފަށައިފިއެވެ.

މި ހާދިސާ ހިނގާފައިވަނީ ގާލީގެ ދެކުނުން ގާތްގަނޑަކަށް 40 ނޯޓިކަލް މޭލު (75 ކިލޯމީޓަރު) ބޭރުންނެވެ.

މި ހާދިސާގައި ފައްތާލާފައިވަނީ އީރާނުގެ ކަނޑުގެ ސިފައިން ބޭނުންކުރާ ފްރިގޭޓެއް ކަމަށްވާ "އައި.އާރް.އެސް.ދީނާ" އެވެ. ޚަބަރުތައް ބުނާ ގޮތުގައި މި މަނަވަރު ފައްތާލީ ސަބްމެރިންއަކުން ދިން ވަރުގަދަ ހަމަލާއެއްގައެވެ. މި ހާދިސާ ހިނގި އިރު އެ އުޅަނދުގައި އީރާނުގެ އަސްކަރިއްޔާގެ 180 އެއްހާ ސިފައިން ތިބި ކަމަށް މަޢުލޫމާތު ލިބެއެވެ.

މީހުން ސަލާމަތް ކުރުމަށް ސްރީލަންކާގެ އަސްކަރިއްޔާއިން ކުރިއަށް ގެންދާ އޮޕަރޭޝަނުގައި މިހާތަނަށް އީރާނުގެ 80 އެއްހާ ސިފައިން ވަނީ ކަނޑުމަތިން ސަލާމަތްކޮށްފައެވެ. ނަމަވެސް، މި ހާދިސާގައި މަދުވެގެން 100 އެއްހާ ސިފައިން ގެއްލިފައިވާ ކަމަށް ރިޕޯޓުތައް ބުނެއެވެ.

އީރާނުގެ މަނަވަރުން ފޮނުވި އެހީއަށް އެދޭ "ޑިސްޓްރެސް ކޯލް" ލިބުމާއެކު، ސްރީލަންކާގެ ނޭވީ އާއި އެއަރފޯސް ގުޅިގެން ވަނީ ސަލާމަތްކުރުމުގެ ބޮޑު އޮޕަރޭޝަނެއް ފަށާފައެވެ. ނޭވީން ބުނީ މިވަގުތު އެންމެ ބޮޑު އިސްކަމެއް ދެނީ މީހުންގެ ފުރާނަ ސަލާމަތްކުރުމަށް ކަމަށާއި، ހާދިސާ ހިނގަން މެދުވެރިވި ސަބަބު ތަހުގީގު ކުރާނީ އޭގެ ފަހުން ކަމަށެވެ.

މި ހާދިސާ ހިނގި ސަރަޙައްދުން އެހެން އެއްވެސް އުޅަނދެއް ނުވަތަ ބޯޓެއް ފެނިފައިނުވާ ކަމަށްވެސް ސްރީލަންކާގެ ސިފައިން ބުނެއެވެ. "އަޅުގަނޑުމެން އުންމީދު ކުރަނީ އިތުރު މީހުން ސަލާމަތް ކުރެވޭނެ ކަމަށް. ކަށަވަރުވަންދެން ހޯދުމުގެ މަސައްކަތް ކުރިއަށް ގެންދާނަން." ނޭވީގެ ތަރުޖަމާނު ވިދާޅުވިއެވެ.