ސްކޭމްގެ މައްސަލައެއްގެ ތަހުގީގަށް ހާޒިރުކުރުމަށް ފުލުހުން ހޯދަމުންދިޔަ ތ. ހިރިލަންދޫ އަންހެންމީހާ ހައްޔަރުކޮށްފިއެވެ.

މި މައްސަލާގައި ހައްޔަރުކޮށްފައިވަނީ ތ. ހިރިލަންދޫ، ނާގަލި، އުމުރުން 41 އަހަރުގެ އައިޝަތު ނާޒިރާއެވެ. އޭނާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމުގެ ޗިޓު ރައްދުނުކުރެވިގެން، އޭނާ ހޯދުމަށް ފުލުހުން އާންމުކޮށް އިއުލާންކުރީ އަންގާރަދުވަހުއެވެ.

ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން، ނާޒިރާގެ ބަންދަށް ވަނީ 15 ދުވަހުގެ މުއްދަތެއް ދީފައެވެ. ކޯޓު އަމުރުގައި ބަޔާންކޮށްފައިވާ ގޮތުގައި، އޭނާ ކުށް ކުރިކަމަށް ތުހުމަތުކުރެވޭ މިންވަރަށް ފުލުހުން ވަނީ ކޯޓަށް ހެކި ހުށަހަޅާފައެވެ.

މިގޮތުން، ފުލުހުން ބޭންކަށް ފޮނުވި ސިޓީތަކާއި އެ ސިޓީތަކަށް ބޭންކުން ދީފައިވާ ޖަވާބުގެ އިތުރުން، މައްސަލައާ ގުޅުންހުރި ފޮޓޯ ރިޕޯޓުތައްވެސް ހެކީގެ ގޮތުގައި ހުށަހަޅާފައިވާކަން ކްރިމިނަލް ކޯޓުގެ އަމުރުން އެނގެއެވެ.

މި މައްސަލައަކީ މަކަރާއި ހީލަތުން ފައިސާ ހޯދާފައިވާ ސްކޭމްގެ މައްސަލައަކަށް ވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.