މިދިޔަ ދޮޅު މަސްދުވަހުގެ ތެރޭގައި ރާއްޖެއަށް ގަވާއިދާ ހިލާފަށް އެތެރެކުރަން އުޅުނު 2 މިލިއަން ސިނގިރޭޓާއި 7000 ވޭޕްސްޓިކް އަތުލައިގެންފައިވާ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހްސާން ވިދާޅުވެއްޖެއެވެ.

މިނިސްޓަރު މިކަން ހާމަކުރެއްވީ ހޯމްލޭންޑް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައެވެ. މިނިސްޓަރު އިހްސާން ވިދާޅުވީ، މިދިޔަ ދޮޅުމަހެއްހާ ދުވަހުގެ ތެރޭގައި ކުރިއަށްގެންދިޔަ ތަފާތު އޮޕަރޭޝަންތަކެއްގައި 2 މިލިއަނެއްހާ ސިނގިރޭޓާއި 7000 ވޭޕް ސްޓިކް އަތުލައިގެންފައިވާ ކަމަށެވެ.

މި ތަކެތި އަތުލައިގެންފައިވަނީ ރާއްޖެއަށް ގަވާއިދާ ހިލާފަށް އެތެރެކުރަން އުޅެނިކޮށް، މޯލްޑިވްސް ކަސްޓަމްސް ސާވިސް އާއި ފުލުހުން ގުޅިގެން ހިންގި ޚާއްޞަ އޮޕަރޭޝަންތަކެއްގެ ތެރެއިންނެވެ.

ރާއްޖެއަށް ވޭޕާއި އެއާ ގުޅުން ހުރި އާލާތްތައް އެތެރެކުރުމާއި، ރާއްޖޭގައި ވޭޕްކުރުން މަނާކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވުމާ ގުޅިގެން، 15 ނޮވެމްބަރު 2024 އިން ފެށިގެން އެފަދަ ތަކެތި ރާއްޖެ އެތެރެކުރުމަކީ މަނާކަމެކެވެ. މި ނިންމެވުމަށްފަހު، ގަވާއިދާ ހިލާފަށް އެތެރެކުރަން އުޅޭ ގިނަ އަދަދެއްގެ ވޭޕް އަންނަނީ އަތުލައިގަންނަމުންނެވެ.

‎ރާއްޖޭގައި ވޭޕް ބޭނުންކުރުމާއި، ވިއްކުމާއި، ހިލޭ ބެހުން މަނާކޮށް، ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާހަށް އަމަލުކުރަން ފަށާފައިވަނީ 2024 ވަނަ އަހަރުގެ ޑިސެންބަރު 15 ވަނަ ދުވަހުން ފެށިގެންނެވެ.

ދުންފަތް މަނާކުރުމުގެ ޤާނޫނުގެ ދަށުން ވޭޕްގެ ބާވަތްތަކާއި އެއާއެކު ބޭނުންކުރުމަށް ތައްޔާރުކޮށްފައި ހުންނަ އާލާތެއް ރާއްޖެއަށް އެތެރެކޮށްފިނަމަ 50000 ރުފިޔާއިން ޖޫރިމަނާ ކުރާނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕަކަށް 10000 ރުފިޔާގެ މަގުން ޖޫރިމަނާކުރުމަށް ޤާނޫނުގައިވަނީ ކަނޑައަޅާފައެވެ.

އަދި، ޤާނޫނަށް ގެނައި އިސްލާޙާއެކު ވޭޕްކުރުމަށް ބޭނުންކުރާ އެއްވެސް އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ އެފަދަ އާލާތްތައް ވިއްކުމުންނާއި ހިލޭ ބެހުމުން ކުރާ ޖޫރިމަނާގެ އިތުރަށް 50000 ރުފިޔާގެ ޖޫރިމަނާއެއް ކުރާނެއެވެ.