އެމެރިކާގައި މިހާރު ވެރިކަން ކުރަމުންދަނީ ޖިންސީ ބޮޑެތި ކުށްތަކެއް ސާބިތުވެފައިވާ ޔަހޫދީ ބިލިއަނަރު ޖެފްރީ އެޕްސްޓިންގެ ގޭންގުން ކަމަށާއި، އެ ގޭންގުގެ ލީޑަރު ކަމަށްވާ އެމެރިކާގެ ރައީސް ޑޮނަލްޑް ޓްރަމްޕަށް އީރާނުގެ ވެރިއަކު ކަނޑައެޅުމުގެ އެއްވެސް ފުރުސަތެއް ނުދޭނެ ކަމަށް އީރާނުގެ ޕާލަމެންޓުގެ ރައީސް މުހައްމަދު ބާގިރު ގަލީބާވް ވިދާޅުވެއްޖެއެވެ.

ތެހެރާންގައި ދެއްވި ބަޔާނެއްގައި، ކުރީގެ އަސްކަރީ ޕައިލެޓެއް ކަމަށްވާ ބާގިރު ވިދާޅުވީ، އީރާނަށް ބޮންއަޅައި އުދުވާނީ ހަމަލާތައް ދީގެން ގެއްލުން ދެވިދާނެ ކަމަށާއި، ގައުމުގެ ވެރިން ޝަހީދުވެސް ކޮށްލެވިދާނެ ކަމަށެވެ. ނަމަވެސް، އީރާނުގެ ވެރިން އިންތިޚާބު ކުރުމުގެ ފުރިހަމަ ބާރު އޮތީ އީރާނުގެ ރައްޔިތުންނާއި ރައްޔިތުން އިންތިޚާބުކޮށްފައިވާ މުއައްސަސާތަކަށް ކަމަށް އޭނާ ފާހަގަކުރެއްވިއެވެ. އެހެންކަމުން، އެޕްސްޓިން ގޭންގުގެ ލީޑަރު ޓްރަމްޕަށް އެ ފުރުސަތު ނުލިބޭނެ ކަމަށް ބާގިރު ވިދާޅުވިއެވެ.

ހަމައެއާއެކު ބާގިރު ވިދާޅުވީ އެމެރިކާއާއި ޔަހޫދީ އިސްރާއީލުގެ އުދުވާންތަކުގެ ސަބަބުން ކޮންމެ ދުވަހަކު އީރާނުގެ އާންމުންނާއި ސިފައިން ޝަހީދުވަމުންދާ ކަމަށެވެ. އަދި އަދަދު ކުރަން ދަތިވާ ވަރުގެ ބޮޑެތި މާއްދީ ގެއްލުންތަކެއް އީރާނަށް ލިބެމުންދާ ކަމަށް އޭނާ ވިދާޅުވިއެވެ. އެމެރިކާއާއި އިސްރާއީލުން ހަމަލާދޭ ތަންތަނުގެ ތެރޭގައި އަސްކަރީ މަރުކަޒުތަކުގެ އިތުރުން ސްކޫލްތަކާއި، ޔުނިވާސިޓީތަކާއި، އާންމުންގެ ގެދޮރާއި މިސްކިތްތައް ހިމެނޭކަން އޭނާ ފާހަގަކުރެއްވިއެވެ.

"މި ތަންތަނަށް ހަމަލާދީ، ސިފައިންނާއި އާންމުން ޝަހީދުކޮށްގެން އީރާން އަމާންދޭނެ ކަމަށް ޓްރަމްޕާއި ނަތަންޔާހޫއަށް ހީވާނަމަ، އެއީ އެ ދެ މުޖްރިމުން ދެކޭ ހުވަފެނެއް." ބާގިރު ވިދާޅުވިއެވެ.

ރިޕޯޓްތައް ބުނާގޮތުން، އެމެރިކާއާއި އިސްރާއީލުގެ ހަމަލާތަކުގައި މިހާތަނަށް އީރާނުގެ 1500 އަށްވުރެ ގިނަ އާންމުން ވަނީ ޝަހީދުކޮށްލާފައެވެ. މީގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނެއެވެ. އެންމެ ފުރަތަމަ ހަމަލާދިން ތަންތަނުގެ ތެރޭގައި އީރާނުގެ ދެކުނުގެ މީނާބް ސަރަހައްދުގެ އަންހެން ކުދިންގެ ސްކޫލެއް ހިމެނޭއިރު، އެއީ ގަސްދުގައި ދިން ހަމަލާއެއްކަން ތަހުގީގުތަކުން ވަނީ ހާމަވެފައެވެ.

ޓްރަމްޕް ވަނީ އީރާނުގެ ވެރިއަކަށް ހުންނަންޖެހޭނީ އޭނާ ރުހޭ މީހެއް ކަމަށް ތަކުރާރުކޮށް ވިދާޅުވެފައެވެ. އެމެރިކާއިން ދަނީ އެހެން ގައުމުތަކުގެ ދާޚިލީ ކަންކަމަށްވެސް ނުފޫޒު ފޯރުވަމުންނެވެ. އެގޮތުން، އިރާގުގެ އިންތިޚާބު ކާމިޔާބުކުރި ނޫރީ އަލްމާލިކީ ބޮޑުވަޒީރު ކަމަށް އައްޔަން ނުކުރުމަށް އެމެރިކާއިން ވަނީ އިންޒާރު ދީފައެވެ.

މިހާރު މަރުވެފައިވާ ޖެފްރީ އެޕްސްޓިންގެ ފައިލްތަކުގައި ޓްރަމްޕްގެ ނަން ތަކުރާރުކޮށް އޮތްއިރު، ޓްރަމްޕް ވެރިކަމާ ހަވާލުވީވެސް މަކަރު ހެދުމާއި ރިޝްވަތު ދިނުމުގެ 34 މައްސަލަ އެމެރިކާގެ ކޯޓުތަކުގައި އޭނާގެ މައްޗަށް ސާބިތުވެފައި ވަނިކޮށެވެ.