މާލެ ސިޓީއަށް ދިމާވެފައިވާ އެކި މައްސަލަތަކަށް ދާއިމީ ހައްލެއް ހޯދައިދެވޭނީ، އެމްޑީޕީން އެކުލަވާލާފައިވާ ޕްލޭންތަކާ އެއްގޮތަށް މަސައްކަތް ކުރާނެ ޓީމެއް ސިޓީ ކައުންސިލަށް އިންތިޚާބު ކޮށްގެން ކަމަށް ކުރީގެ ރައީސް އިބްރާހިމް މުޙައްމަދު ސޯލިހް ވިދާޅުވެއްޖެއެވެ.

ރައީސް ސޯލިހް މިހެން ވިދާޅުވީ, ކުރިއަށް އޮތް ލޯކަލް ކައުންސިލްތަކުގެ ބައި-އިލެކްޝަނާ ދިމާކޮށް އެމްޑީޕީން ހުކުރު ދުވަހުގެ ރޭ މާލޭގައި ކުރިއަށް ގެންދިޔަ "ދޮރުން ދޮރަށް" ހަރަކާތުގެ ތެރެއިން މީޑިޔާ އަށް ދެއްވި އިންޓަވިއުއެއްގައެވެ.

ރައީސް ސޯލިހް ވިދާޅުވީ މާލޭގެ ޕާކިން މައްސަލައާއި، ފެންބޮޑުވުމުގެ މައްސަލަ ފަދަ ބޮޑެތި ދަތިތަކަށް ހައްލު ހޯދުމަށް އެމްޑީޕީން ނުކުންނަނީ ވަރަށް ބޮޑަށް ތަރުތީބު ކުރެވިފައިވާ ރޭވުންތަކަކާ އެކު ކަމަށެވެ. އެހެންކަމުން، ކުރިއަށް އޮތް އިންތިޚާބުގައި އެމްޑީޕީގެ ކެންޑިޑޭޓުންނަށް މެޖޯރިޓީ ދިނުމަކީ ރައްޔިތުންނަށް ލިބޭނެ ވަރަށް ބޮޑު ފަސޭހައެއް ކަމަށް އެމަނިކުފާނު ފާހަގަކުރެއްވިއެވެ.

މާލެ ސިޓީ ކައުންސިލްގެ ތަޖުރިބާއަށް އަލިއަޅުއްވާލައްވަމުން ރައީސް ސޯލިހް ވިދާޅުވީ، ވޭތުވެދިޔަ ދެ އަހަރެއްހާ ދުވަހުގެ ތެރޭގައި ކައުންސިލްގެ މެޖޯރިޓީ އެމްޑީޕީއަށް ނެތުމުގެ ސަބަބުން ރައްޔިތުންނަށް ކަންކަން ކޮށްދިނުމުގައި ވަރަށް ބޮޑެތި ދަތިތަކާ ކުރިމަތިލާންޖެހުނު ކަމަށެވެ. ނަމަވެސް، އެ ދަތި އުނދަގުލުގެ ތެރޭގައިވެސް ލިބުނު މަދު ވަގުތުކޮޅުގެ ތެރޭގައި މާލޭގެ ރައްޔިތުންނަށް ގިނަ ކަންތައްތަކެއް ކޮށްދެވިފައިވާ ކަން އެމަނިކުފާނު ފާހަގަކުރެއްވިއެވެ.

"މި ބޭފުޅުން ހޮވާ ދެއްވައިފިއްޔާ އަޅުގަނޑަށް ޔަގީން މާލޭގަ މިހުރި މައްސަލަތައް، ޕާކިން މައްސަލަ އާ އެއް ގެއިން އަނެއް ގެޔަށް ފެން ފޭބުމުގެ މައްސަލައާ ދެން މިހެން ގޮސް ވަރަށް އެހެން ކަހަލަ ދަތި އުނދަގޫ މައްސަލަތަކަށް ހައްލު ހޯދައިދިނުމަށްޓަކައި ވަރަށް ބުރަކޮށް މަސައްކަތް ކުރާނެ،" ރައީސް ސޯލިހް ވިދާޅުވިއެވެ.

ރައީސް ސޯލިހް އިތުރަށް ވިދާޅުވީ އެމްޑީޕީން ކައުންސިލަށް ވާދަކުރަނީ މާލޭގައި ހުރި ގޮންޖެހުންތަކާއި ރައްޔިތުންގެ ކަންބޮޑުވުންތައް ވަރަށް ރަނގަޅަށް ދެނެތިބެ، އެކަންކަމަށް ހައްލު ހޯދައިދެވޭނެ ގޮތްތައް އިންތިޒާމްކޮށް ރާވައިގެން ކަމަށެވެ. އަދި އުއްމީދަކީ އަންނަ އިންތިޚާބުގައި އެމްޑީޕީއަށް މެޖޯރިޓީ ލިބި، ފަސޭހަކަމާއެކު ރައްޔިތުންނަށް ޚިދުމަތްތައް ފޯރުކޮށްދިނުން ކަމަށްވެސް ރައީސް ސޯލިހް ވިދާޅުވިއެވެ.