އިގްތިސާދީ ގޮތުން ނާޒުކު ފަށަލައެއްގައި އޮތް ޕާކިސްތާނުން، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ދައްކަންޖެހޭ 3.5 ބިލިއަން ޑޮލަރުގެ ބޮޑު ދަރަނި އަންނަ ހަފްތާގެ ތެރޭގައި އަނބުރާ ދައްކަން ޖެހުމުން، އެ ގައުމުގެ އިގްތިސާދަށް އިތުރު ލޮޅުންތަކެއް އަރާފާނެ ކަމުގެ ބިރު ބޮޑުވެއްޖެއެވެ.

"ދަ އެކްސްޕްރެސް ޓްރިބިއުން" އިން ރިޕޯޓްކޮށްފައިވާ ގޮތުގައި، އިސްލާމްއާބާދުން މިހާރު ނިންމާފައިވަނީ މި މުޅި ދަރަނި އޭޕްރީލް މަހުގެ ތެރޭގައި ފިޔަވަހިތަކަކަށް ބަހާލައިގެން ދައްކައި ޚަލާސްކުރުމަށެވެ. އެގޮތުން، އަންނަ ހަފްތާގައި ގާތްގަނޑަކަށް 450 މިލިއަން ޑޮލަރު ދެއްކުމަށްފަހު، މި މަހުގެ ފަހުކޮޅު ދެ ބިލިއަން ޑޮލަރާއި އިތުރު އެއް ބިލިއަން ޑޮލަރު ދައްކައި ނިންމުމަށް ވަނީ ރޭވިފައެވެ.

މި ފައިސާ ދެއްކުމަށް ޕާކިސްތާނުން ނިންމާފައި މިވަނީ، ލޯނު ދެއްކުމާ މެދު މަސްތަކެއް ވަންދެން އުފެދިފައި އޮތް ނުތަނަވަސްކަމަށް ފަހުގައެވެ. މީގެކުރިން ގަލްފުގެ ގައުމުތަކުން ޕާކިސްތާނަށް ފައިސާ ދެއްކުމަށް ލުއިތަކާއި އިތުރު މުއްދަތު ދެމުން އައި ނަމަވެސް، މިފަހަރު ޔޫއޭއީން އަމަލުކުރަމުންދަނީ ތަފާތު ގޮތަކަށެވެ. އެގައުމުން ދަނީ ކުރު މުއްދަތުގެ ކުދި ލޯނުތަކެއް ދެމުންނެވެ. މިއީ ގިނަ ދުވަސްތަކެއް ވަންދެން ގާތް އެކުވެރިއެއްގެ ގޮތުގައި އޮތް ޔޫއޭއީގެ ފަރާތުން ފެނުނު ހަރުކަށި އިޝާރާތެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.

މި ފައިސާ އަނބުރާ ދެއްކުމަށް ގައުމުގެ ރިޒާވް ބޭނުންކުރުމަކީ ޕާކިސްތާނުގެ ފޮރިން އެކްސްޗޭންޖް ރިޒާވަށް ބޮޑު ޕްރެޝަރެއް ކުރިމަތިވެ، މާލިއްޔަތު ބެލެހެއްޓުމުގެ ގާބިލްކަން ބަލިކަށިވެދާނެ ކަމެކެވެ. ދެގައުމުގެ ދެމެދުގައި އުފެދިފައިވާ ނުތަނަވަސްކަމުގެ އަސްލަކީ، ސަރަހައްދީ ހަމަނުޖެހުންތަކުގެ ތެރޭގައި ޕާކިސްތާނުން އީރާނާ ގާތް ގުޅުމެއް ބާއްވާ ކަމަށް އަބޫދާބީއަށް ގަބޫލުކުރެވުމެވެ. މީގެ ސަބަބުން ޕާކިސްތާނުގެ ޚާރިޖީ ސިޔާސަތާ މެދު އެމިރޭޓްސްގެ އޮފިޝަލުންގެ މެދުގައި ވަނީ ސުވާލު އުފެދިފައެވެ. މި ހާސްކަމުގެ ސަބަބުން ޔޫއޭއީން ދިނުމަށް ރޭވި 2 ބިލިއަން ޑޮލަރުގެ އެހީގެ ޕެކޭޖަށް ވެސް މިހާރު ވަނީ ހުރަސްތަކެއް ކުރިމަތިވެފައެވެ.

އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ ޕްރޮގްރާމްގެ ދަށުން ޕާކިސްތާނުން ސައުދީ އަރަބިއްޔާ، ޔޫއޭއީ އަދި ޗައިނާ ފަދަ ގައުމުތަކުގެ އެހީއަށް ވަރަށް ބޮޑަށް ބަރޯސާވެއެވެ. ނަމަވެސް އެންމެ ފަހުގެ ކުރިއެރުންތަކުން ދޭހަވަނީ، ކުރިއަށް އޮތްތަނުގައި އެހީއެއް ލިބުނަސް އެއީ މާ ހަރުކަށި ޝަރުތުތަކަކާއެކު ލިބޭނެ އެހީތަކެއް ކަމެވެ.

މިކަމާ ގުޅިގެން ޕާކިސްތާނުގެ ބޮޑުވަޒީރު ޝެހްބާޒް ޝަރީފް ދާދި ފަހުން ވިދާޅުވީ، ތަކުރާރުކޮށް އެހެން ގައުމުތަކުގެ އެހީއަށް ބަރޯސާވުމަކީ ގައުމުގެ "އަމިއްލަ އިހުތިރާމަށް" އަސަރުކުރާ ކަމެއް ކަމަށެވެ. އަދި ލޯނު ދޫކުރާ ފަރާތްތަކުން އަބަދުވެސް ބަދަލުގައި ކަންތައްތަކަކަށް އުންމީދުކުރާނެ ކަމަށް އޭނާ އެއްބަސްވެވަޑައިގެންފައެވެ.