ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އަކީ މިއަދު ރާއްޖޭގައި އޮތް އެންމެ ބޮޑު ސިޔާސީ ޕާޓީ ކަމަށާއި، އެ ޕާޓީއާ ވާދަކުރެވޭނެ ފަދަ ތަރުތީބުވެފައިވާ އިދިކޮޅު ހަރަކާތެއް ފެންނަން ނެތް ކަމަށް އިގްތިސާދީ ތަރައްގީއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

ޕީއެންސީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސައީދު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ޕާޓީ ވަރުގަދަކުރެއްވުމަށް ކުރެއްވި މަސައްކަތްޕުޅުގެ ނަތީޖާ މިއަދު ފެންނަމުންދާ ކަމަށެވެ.

​މިނިސްޓަރު ސައީދު ފާހަގަކުރެއްވި ގޮތުގައި، ޕީއެންސީއަކީ މިވަގުތު ރާއްޖޭގެ އެންމެ ވަރުގަދަ ސިޔާސީ ބާރަށް ވީއިރު، ރަސްމީ ސިފައެއްގައި ހިންގާ ވާދަވެރި ސިޔާސީ ޕާޓީއެއް ނެތުމަކީ ޑިމޮކްރަސީއަށް ލިބޭ އުނިކަމެކެވެ. ސަރުކާރު ޒިންމާދާރުކުރުވޭނެ ފަދަ އޯގަނައިޒްޑް އިދިކޮޅު ޕާޓީއެއް ފެނުމުގެ ބަދަލުގައި، ފެންނަމުންދަނީ އެހެން ޕާޓީތަކުގެ އެތެރޭގައި އޮތް ތަޅާފޮޅުމާއި ހަމަނުޖެހުމުގެ އަޑުތައް ކަމަށް އޭނާ ވިދާޅުވިއެވެ.

​މީގެ އިތުރުން، ސައީދު ވަނީ އިދިކޮޅު ބައެއް ޕާޓީތަކުގައި "ސިޔާސީ މެޗޫރިޓީ" ނުވަތަ ފަންނުވެރިކަން ނެތްކަމަށް ވިދާޅުވެ ފާޑުވިދާޅުވެފައެވެ.

ޕާޓީތަކުގެ އެތެރޭގެ ކޯޅުންތައް އާންމު ރައްޔިތުންނާ ހަމައަށް ތިލަވެ، އޭގެ ނޭދެވޭ އަސަރު މުޖުތަމައަށް ކުރަމުންދާ ކަމަށް ވިދާޅުވެ، ވަޒީރު ވަނީ އެކަމުގެ ހިތާމަ ފާޅުކުރައްވާފައެވެ.