ސެނެގާލްގެ ރައީސް ބާސިރޫ ދިއޮމާޔޭ ފޭ، އެގައުމުގެ ބޮޑުވަޒީރު އުސްމާން ސޮންކޯ މަގާމުން ވަކިކުރައްވައި ސަރުކާރު އުވާލައްވައިފިއެވެ.

ދައުލަތުގެ މީޑިއާ މެދުވެރިކޮށް ރިޔާސީ އެހީތެރިއަކު އިއުލާން ކުރެއްވި ގޮތުގައި، ކެބިނެޓުގެ ހުރިހާ ވަޒީރުން ވެސް މިހާރު ވަނީ މަގާމުން ވަކިކުރެވިފައެވެ.

ނަމަވެސް އައު ސަރުކާރެއް އެކުލަވައިލެވެންދެން، އުވާލެވުނު ސަރުކާރުގެ ވަޒީރުން ދައުލަތުގެ ދުވަހުން ދުވަހަށް ކުރަންޖެހޭ ކަންކަން ބަލަހައްޓަމުން ގެންދާނެއެވެ.

މި ނިންމެވުން އައިސްފައިވަނީ ރައީސް ފޭ އާއި ބޮޑުވަޒީރު ސޮންކޯއާ ދެމެދު ފާއިތުވި މަސްތަކުގައި ސިޔާސީ ހިޔާލުތަފާތުވުންތައް ބޮޑުވެ، ގުޅުން ގޯސްވެފައިވާ ދަނޑިވަޅެއްގައެވެ.

ޒުވާނުންގެ މެދުގައި ބޮޑު މަގުބޫލުކަމެއް އޮންނަ ސޮންކޯއަކީ 2024 ވަނަ އަހަރުގެ ރިޔާސީ އިންތިޚާބުގައި ވާދަކުރުމުގެ ފުރުސަތު ބަންދުވުމުން، ފޭ އިންތިޚާބު ކާމިޔާބު ކުރެއްވުމަށް އެންމެ ބޮޑަށް އެހީތެރިވެދެއްވި ސިޔާސީ ލީޑަރެވެ.

ނަމަވެސް ވެރިކަމަށް އައުމަށްފަހު ދެ ބޭފުޅުންގެ މެދުގައި ވަނީ ރޭވުންތަކާ މެދު ދެބަސްވުންތައް އުފެދިފައެވެ. މި ސިޔާސީ ހަލަބޮލިކަމުގެ ސަބަބުން، ސެނެގާލްއަށް ދިމާވެފައިވާ އިގްތިސާދީ ދަރަނީގެ ކްރައިސިސްއިން އަރައިގަތުމަށް ބައިނަލްއަގުވާމީ މާލީ އިދާރާ (އައިއެމްއެފް) އާއެކު ކުރިއަށްދާ 1.8 ބިލިއަން ޑޮލަރުގެ ލޯނު އެހީގެ މަޝްވަރާތަކަށް އިތުރު ހުރަސްތަކެއް ކުރިމަތިވެދާނެ ކަމުގެ ބިރު މިހާރު ވަނީ ބޮޑުވެފައެވެ.