މުމްބާއީ އިންޑިއަންސްގެ ބެޓިން ކޯޗު ކީރަން ޕޮލާޑް ހާމަކުރި ގޮތުގައި، ހާރްދިކް ޕާންޑިޔާގެ އިރުޝާދުގެ ދަށުން މި ސީޒަނުގައި ޓީމުގެ ނަތީޖާތައް ފެނިގެންދިޔައީ ކުޅުންތެރިންނާއި މެނޭޖްމަންޓުން އުންމީދުކުރި ފެންވަރަށްވުރެ މާ ދަށުންނެވެ. ތާވަލުގެ ނުވަވަނައިގައި މުމްބާއީ އިންޑިއަންސް ސީޒަން ނިންމާލަން ޖެހުމާއެކު، ޓީމުގެ ކުރިމަގާ މެދު އެތެރޭގެ ފުން މަޝްވަރާތަކެއް ކުރަންޖެހޭ ކަމުގެ އިޝާރާތެއް ޕޮލާޑް ވަނީ ދީފަ އެވެ. އައި.ޕީ.އެލްގައި އެ ފްރެންޗައިޒަށް ކުރިމަތިވި މި ނާކާމިޔާބީއާ ގުޅިގެން، ހާރްދިކްގެ ލީޑަރޝިޕާ މެދު ސީދާ ބަހުން ސުވާލު ނުއުފެއްދި ނަމަވެސް، ޕޮލާޑްގެ ވާހަކަތަކުން އެކަމާ މެދު ހިތްހަމަނުޖެހުން ހުރިކަން ދޭހަވެއެވެ. މިއީ ވޭތުވެދިޔަ ތިން އަހަރުގެ ތެރޭގައި ހާރްދިކްގެ ކެޕްޓަންކަމުގައި ޓީމު ތާވަލުގެ އެންމެ ފުލުގެ ދެ މަޤާމުން ކުރެ މަޤާމެއްގައި ނިންމާލި ދެވަނަ ފަހަރެވެ.

މުބާރާތުގެ ކޮންމެ ސީޒަނެއްގައި ވެސް ކަރުދާހުގައި އެންމެ ވަރުގަދަ ސްކޮޑެއް އޮންނަ އެއް ޓީމަކީ މުމްބާއީ ކަމަށް ވިޔަސް، ހާރްދިކްގެ ލީޑަރޝިޕުގައި އެދެވޭ ނަތީޖާއެއް ނެރެވިފައެއް ނުވެއެވެ. 2024 ވަނަ އަހަރު އޭނާ ކެޕްޓަންކަމާ ހަވާލުވުމުން ސަޕޯޓަރުންގެ ފާޑުކިޔުންތައް އަމާޒުވި ނަމަވެސް، 2025 ގައި ކޮންމެވެސް ވަރެއްގެ ކުރިއެރުމެއް ފެނުނެވެ. އެހެންނަމަވެސް، 2026 ގެ ސީޒަނުގައި ޓީމުގެ ފަރާތުން އަނެއްކާވެސް ފެނުނީ ބަލިކަށި ކުޅުމެކެވެ. 2026 ގެ ޓީ20 ވޯލްޑް ކަޕް އިންޑިއާއިން ކާމިޔާބުކުރުމާ ގުޅިގެން، މުމްބާއީގައި ތިބި އިންޑިއާގެ ތަރިންގެ ބޭނުން ހިފައިގެން މުބާރާތުގައި ރަނގަޅު ވާދައެއް ކުރާނެ ކަމަށް ބެލެވުނެވެ. ނަމަވެސް، މުޅި ސީޒަނުގައި ވެސް ފެނިގެންދިޔައީ ކުޅުމުގެ އެއްގޮތްކަމެއް ނެތް، މާޔޫސްކުރުވަނިވި މަންޒަރުތަކެކެވެ. މި ނާކާމިޔާބީގެ ބޮޑު ޒިންމާއެއް ހާރްދިކްގެ ބޮލުގައި އެޅިފައިވާއިރު، އޭނާގެ ޓެކްޓިކަލް ނިންމުންތަކަށް ސީޒަނުގެ އެކި ހިސާބުތަކުގައި ފާޑުކިޔުންތައް އަމާޒުވިއެވެ.

ސީޒަނުގެ ފަހު މެޗަށްފަހު ވާހަކަދައްކަމުން ޕޮލާޑް އެއްބަސްވި ގޮތުގައި، ކަންތައްތައް ހިނގައިދިޔަ ގޮތާ މެދު މެނޭޖްމަންޓާއި ހާރްދިކް ވެސް ތިބީ ހިތްހަމަނުޖެހިފައެވެ.

"ހާރްދިކްގެ ލީޑަރޝިޕަށް ބަލާއިރު، އަމިއްލަ ފަރުދެއްގެ ގޮތުން ވެސް އޭނާ ބޭނުންވި މިސްރާބަށް ކަންކަމެއް ނުދިޔަ. މެނޭޖްމަންޓުން އަޅުގަނޑުމެން އުންމީދުކުރި ނަތީޖާއެއް ވެސް ނުލިބުނު. އެކަމަކު ފްރެންޗައިޒް ކާމިޔާބީގެ މަގަށް ގެންދިއުމަށް ކުރެވެން ހުރި ހުރިހާ މަސައްކަތެއް ކުރިން،" ޕޮލާޑް ފާހަގަކުރިއެވެ. "މިއީ ވަކި މީހަކު ކުށްވެރިކުރަންވީ ވަގުތެއް ނޫން. ބަލިވުމަކީ މުޅި ޓީމުގެ ނާކާމިޔާބީއެއް. މޮޅާއި ބައްޔަކީ ކުޅިވަރުގެ ފިލާވަޅުތައް." އެހެންނަމަވެސް، މުޅި ސީޒަން ފުރިހަމައަށް ރިވިއުކުރުމަށްފަހު، ޓީމުގެ މުސްތަޤުބަލަށް ގެންނަންޖެހޭ ބަދަލުތަކާ މެދު ގޮތްތަކެއް ނިންމާނެ ކަމަށް އޭނާ ބުންޏެވެ.

"ބައެއް ކަންކަމާ މެދު އަޅުގަނޑު ސުވާލު އުފައްދަން. ހާރްދިކާއި އަޅުގަނޑުމެން އެންމެން ވެސް ބުރަ މަސައްކަތްތަކެއް ކުރިން، އެކަމަކު ނަތީޖާ ނުކުތީ ބޭނުންވި ގޮތަކަށް ނޫން. އެހެންކަމުން އަލުން މަޝްވަރާކޮށް، އެންމެ ރަނގަޅު ގޮތަކީ ކޮބައިތޯ ބަލަންޖެހޭ. ކުރިއަށް ވާނެ ގޮތެއް ބުނަން އަދި ދަތި. މިވަގުތަށް އޮތީ މި މާޔޫސްކަމުން އަރައިގަނެ، ކުރިއަށް އޮތް 12 މަސް ދުވަހުގެ ތެރޭގައި ވަރުގަދަކޮށް އެނބުރި އައުން،" ޕޮލާޑް އިތުރަށް ބުންޏެވެ.

ކުރިއަށް އޮތް އައި.ޕީ.އެލް ސީޒަނަށް ތައްޔާރުވާއިރު، ހާރްދިކް ޕާންޑިޔާގެ ކެޕްޓަންކަމަކީ އެންމެ ބޮޑު ބަހުސަކަށް ވާނެ މައުޟޫއެވެ. މުމްބާއީ އިންޑިއަންސްއިން ފާޅުގައި ކެޕްޓަނަށް ތާއީދުކުރި ނަމަވެސް، ފާއިތުވި ސީޒަންތަކުގައި ލިބުނު ދަށް ނަތީޖާތަކުގެ ސަބަބުން ވަނީ ގިނަ ސުވާލުތަކެއް އުފެދިފައެވެ.

ވޭތުވެދިޔަ ދިހަވަރަކަށް އަހަރު ތެރޭގައި އެއްފެންވަރެއްގައި ކާމިޔާބު ކުޅުމެއް ދައްކަމުން އައި ޓީމަކަށް، ފާއިތުވި ތިން ސީޒަނުގެ ތެރެއިން ދެ ސީޒަން ނާކާމިޔާބުވުމަކީ ޓީމުގެ މިސްރާބާ މެދު އޮތް ބޮޑު ކަންބޮޑުވުމެކެވެ. މުމްބާއީ ސީޒަނާ ކުރިމަތިލީ އެންމެ ވަރުގަދަ ޓީމާއެކު ކަމަށް ވިޔަސް، ތަކުރާރުކޮށް ހެދުނު ޓެކްޓިކަލް ގޯސްތަކާއި ކުޅުންތެރިންގެ ފޯމު ދަށްވުމުގެ ސަބަބުން ހުރިހާ އުންމީދެއް ފެނަށް ދިޔައީއެވެ. ޕޮލާޑްގެ ވާހަކަތަކުން އެ މާޔޫސްކަން ސާފުކޮށް ފެންނަން އޮތްއިރު، ދަށް ނަތީޖާތަކާ ގުޅިގެން ސީރިއަސް ބަދަލުތަކެއް ގެންނަންޖެހޭ ކަމަށް އޭނާ ޤަބޫލުކުރެއެވެ.

މުމްބާއީ އިންޑިއަންސްއިން މިހާރު އޮތް ލީޑަރޝިޕާއެކު ކުރިއަށްދާނީތޯ ނުވަތަ ޓީމުގެ އޮނިގަނޑަށް ބޮޑު ބަދަލެއް ގެންނާނީތޯ ބަލަން އަދި ކުޑަ ދުވަސްކޮޅަކަށް މަޑުކޮށްލަން ޖެހެއެވެ. ނަމަވެސް ކަށަވަރުވާ ކަމަކީ، އުންމީދުކުރި ވަރަށްވުރެ ބޮޑަށް ފެއިލްވުމުން، އެ ފްރެންޗައިޒުން މިހާރު ތިބީ ޖަވާބު ހޯދަންޖެހޭ ގިނަ ސުވާލުތަކެއްގެ ކުރިމަތީގައި ކަމެވެ.