ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަން ކާމިޔާބުކުރެއްވި، އައްޑޫ ސިޓީގެ ކުރީގެ މޭޔަރު އަބްދުﷲ ސޯދިގު (ސޯބެ) ރައްޔިތުންގެ މަޖިލީހުގެ މެންބަރުކަމުގެ ހުވާކުރައްވައިފިއެވެ.

މިއަދު ހެނދުނު މަޖިލީހުގެ ޖަލްސާ ފެށުމުގެ ކުރިން ބޭއްވި ރަސްމިއްޔާތެއްގައި، އޭނާ މަގާމުގެ ހުވާކުރެއްވީ އެ ދާއިރާގެ އިންތިޚާބު ކާމިޔާބުކުރެއްވުމާ ގުޅިގެންނެވެ.

މި ދާއިރާގެ ގޮނޑި ހުސްވީ، ކުރިން އެ ގޮނޑި ފުރުއްވި ޕީއެންސީގެ މެންބަރު އަހުމަދު ސިނާންގެ މައްޗަށް ސާބިތު ދަރަންޏެއް އޮތްކަމަށް ސުޕްރީމް ކޯޓުން ކަނޑައެޅުމުން އޭނާގެ މެންބަރުކަން ގެއްލުމާ ގުޅިގެންނެވެ.

މި މަހުގެ 6 ވަނަ ދުވަހު ބޭއްވި ބައި-އިލެކްޝަންގައި ސޯބެއާ ވާދަކުރެއްވީ ސަރުކާރު ހިންގާ ޕީއެންސީގެ ކެންޑިޑޭޓް އަހުމަދު ސައީދު (ސޮޑާ) އެވެ. ވާދަވެރި އިންތިޚާބަކަށް ފަހު، ސޯބެ ވަނީ 62 ވޯޓުގެ ތަފާތަކުން މި އިންތިޚާބު ކާމިޔާބުކުރައްވައިފައެވެ. އެގޮތުން ސޯބެއަށް 1،375 ވޯޓު ލިބިވަޑައިގެންނެވިއިރު، ސޮޑާއަށް ލިބިވަޑައިގަތީ 1،313 ވޯޓެވެ.

އަބްދުﷲ ސޯދިގަކީ ދިގު މުއްދަތެއް ވަންދެން އައްޑޫ ސިޓީގެ މޭޔަރުކަން ކުރައްވާފައިވާ ބޭފުޅެކެވެ. އެގޮތުން 2011 ވަނަ އަހަރުން ފެށިގެން 2021 ވަނަ އަހަރާ ހަމައަށް 10 އަހަރު ދުވަހު އޭނާ މޭޔަރުކަން ކުރެއްވިއެވެ.

މީގެ އިތުރުން، އެމްޑީޕީގެ ފަހުގެ ވެރިކަމުގައި ޕްލޭނިން މިނިސްޓްރީގެ ސްޓޭޓް މިނިސްޓަރުކަމުގެ މަގާމު ވެސް އޭނާ އަދާކުރައްވައިފައިވެއެވެ.