ހުޅުމާލޭގައި ހިންގާ ގަރާޖުތައް ބަލައި ފާސްކުރުމަށް ހިންގި ޚާއްސަ އޮޕަރޭޝަނެއްގެ ތެރެއިން، ރާއްޖޭގައި ގަވާއިދާ ޚިލާފަށް އުޅެމުންދިޔަ 12 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް އިމިގްރޭޝަނުން މައުލޫމާތު ދީފައިވާ ގޮތުގައި މި އޮޕަރޭޝަން ކުރިއަށް ގެންގޮސްފައިވަނީ މިދިޔަ ހޯމަ ދުވަހުއެވެ. މިއީ މާލެ ސަރަހައްދުގައި ގަވާއިދާ ޚިލާފަށް އުޅޭ ބިދޭސީން ހޯދުމަށްޓަކައި ސަރުކާރުން ފަށާފައިވާ ސިލްސިލާ އޮޕަރޭޝަންތަކުގެ ތެރެއިން ހިންގުނު މުހިންމު ހަރަކާތެކެވެ.

މި އޮޕަރޭޝަންގައި ހުޅުމާލޭގެ އެކި ސަރަހައްދުތަކުގައި ހުރި ގަރާޖުތަކަށް ޒިޔާރަތްކޮށް، އެ ތަންތަނުގައި މަސައްކަތް ކުރަމުންދިޔަ ޖުމްލަ 20 ބިދޭސީއެއްގެ ލިޔެކިޔުންތައް ވަނީ ބަލައި ފާސްކޮށްފައެވެ. އޭގެ ތެރެއިން އިމިގްރޭޝަންގެ ގަވާއިދުތަކާ ޚިލާފަށް އުޅެމުންދިޔަ 12 މީހަކު ދެނެގަނެވި، އެ މީހުން މިހާރު ވަނީ ކަމާބެހޭ އިދާރާތަކުގެ ބެލުމުގެ ދަށަށް ގެންގޮސްފައެވެ.

އިމިގްރޭޝަނުން ބުނި ގޮތުގައި ބެލުމުގެ ދަށަށް ގެނެވުނު މީހުންގެ ތެރޭގައި ރާއްޖޭގައި އުޅުމުގެ ސައްހަ ވިސާއެއް ނެތް މީހުންނާއި، ވިސާ އޮތް ނަމަވެސް ކަނޑައެޅިފައިވާ ގަވާއިދުތަކާ ޚިލާފަށް ވަޒީފާ އަދާކުރަމުންދިޔަ މީހުން ހިމެނެއެވެ. މި މީހުންނާމެދު ގާނޫނީ ގޮތުން އަޅަންޖެހޭ ފިޔަވަޅުތައް އެޅުމުގެ މަސައްކަތް މިހާރު ދަނީ ކުރަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބިދޭސީންގެ މައްސަލަ ހައްލުކުރުމަށް ދެއްވާ އިސްކަމުގެ ދަށުން، ކަމާބެހޭ އިދާރާތައް ގުޅިގެން އުފައްދާފައިވާ ޚާއްސަ ޓާސްކް ފޯސްއިން ދަނީ މާލެ، ހުޅުމާލެ އަދި ވިލިމާލޭގެ އެކި ތަންތަން ބަލައި ފާސްކުރަމުންނެވެ. މިގޮތުން ގަވާއިދާ ޚިލާފަށް ވިޔަފާރިކުރާ ތަންތަނާއި، ސާފުތާހިރުކަން ކުޑަ ތަންތަނުގައި ކާތަކެތި ތައްޔާރުކުރާ ތަންތަން ބަލައި ފާސްކުރުމުގެ މަސައްކަތްވެސް ހުއްޓުމެއް ނެތި ދަނީ ކުރިއަށެވެ.