ޕާކިސްތާނުގައި އަންހެނުން ބޭނުންކުރާ ސާފުތާހިރުކަމުގެ ސާމާނު (ސެނިޓަރީ ޕެޑް) އިން ނަގަމުން އައި ޓެކްސް އުވާލުމަށް އެގައުމުގެ ސަރުކާރުން ނިންމައިފިއެވެ.

މިއީ އެގައުމުގެ ޒުވާން ދެ ވަކީލުން ކަމަށްވާ މަންޫރު އުމަރު އާއި އަހްސަން ޖަހަންގީރު ހާން އިސްވެ ތިބެ ކުރި ކާމިޔާބު މަސައްކަތެއްގެ ނަތީޖާއެވެ.

ޕާކިސްތާނުގެ ފައިނޭންސް މިނިސްޓަރު މުހައްމަދު އައުރަންގްޒޭބް 2026-27 ވަނަ އަހަރުގެ ބަޖެޓު ހުށަހަޅުއްވަމުން ވިދާޅުވީ، ސެނިޓަރީ ޕެޑާއި އެފަދަ ތަކެއްޗަކީ އަންހެނުންގެ ސިއްހަތާއި ޝަރަފާއި އަދި މުޖުތަމައުގައި ފުރިހަމައަށް ބައިވެރިވުމަށް ކޮންމެހެން ބޭނުންވާ ތަކެތި ކަމަށެވެ.

އެހެންކަމުން، މިތަކެތިން ނަގަމުން އައި 18 އިންސައްތައިގެ ސޭލްސް ޓެކްސް އުވާލަން ސަރުކާރުން ވަނީ ނިންމާފައެވެ.

މި ނިންމުމަކީ ޕާކިސްތާނުގެ މުޖުތަމައުގައި ވަރަށް ބޮޑަށް ފޮރުވިފައިވާ އަދި ވާހަކަ ދައްކަން ޖެހިލުންވާ މައުޟޫއެއް ކަމުގައިވާ އަންހެނުންގެ ޖިންސީ އަދި ރީޕްރޮޑަކްޓިވް ހެލްތާ ބެހޭގޮތުން ގައުމީ ފެންވަރުގައި ވާހަކަ ދެކެވުމަށް ލިބުނު ބޮޑު ކުރިއެރުމެއް ކަމަށް ހައްގުތަކަށް މަސައްކަތްކުރާ ފަރާތްތަކުން ދެކެއެވެ.

ޕާކިސްތާނުގެ ގިނަ އަންހެނުންނަށް، ހާއްސަކޮށް ފަގީރު އަދި ރަށްފުށުގެ ސަރަހައްދުތަކުގައި އުޅޭ އަންހެނުންނަށް މިފަދަ ތަކެތި ގަތުމުގެ ތަނަވަސްކަން ނެތުމުން، އެމީހުންނަށް ރައްކާތެރި ނޫން ގޮތްގޮތަށް ކަންކަން ކުރަން ޖެހެއެވެ.

ޔުނިސެފްގެ ތަފާސްހިސާބުތައް ދައްކާ ގޮތުން، ޕާކިސްތާނުގެ އާބާދީގެ ވަރަށް މަދު ބައެއް ނޫނީ ވިޔަފާރީގެ އުސޫލުން އުފައްދާފައިވާ މިފަދަ ސާފުތާހިރުކަމުގެ ސާމާނު ބޭނުން ނުކުރެއެވެ.

ނަމަވެސް، މި ޓެކްސް އުވާލުމަކީ ހައްލު ހޯދަން ކުރާ ދިގު ދަތުރުގެ ފުރަތަމަ ފިޔަވަޅު އެކަނި ކަމަށް މިކަމުގައި އިސްކޮށް އުޅުނު ފަރާތްތަކުން ބުނެއެވެ.

އެމީހުން ކޯޓަށް ހުށަހެޅި ޕެޓިޝަނުގައި ހަމައެކަނި 18 އިންސައްތައިގެ ސޭލްސް ޓެކްސް އުވާލުން ނޫން، އިމްޕޯޓް ޑިއުޓީއާއި އެހެނިހެން ޓެކްސްތައް ވެސް ހިމެނޭހެން މިފަދަ ތަކެތި މުޅިން ޓެކްސް ފްރީ ކުރުމަށް ވަނީ ގޮވާލާފައެވެ.

މީގެ އިތުރުން، އާބާދީ ކޮންޓްރޯލް ކުރުމުގެ ގޮތުން ޕާކިސްތާން ސަރުކާރުން ވަނީ އުފަންދުވަސް ކޮންޓްރޯލް ކުރުމަށް ބޭނުންކުރާ ތަކެތިން ވެސް ޓެކްސް ކަނޑާލަން ނިންމާފައެވެ.