ބާޒާރުގައި ވިއްކަމުންދާ ފޭކު ނުވަތަ ސައްހަ ނޫން ބޭސްތައް ހުއްޓުވުމަށްޓަކައި، ބޭސް ބަންދުކުރުމަށް ބޭނުންކުރާ ސާމާނު އުފައްދާ ފަރާތްތަކާއި ސަޕްލައިކުރާ ފަރާތްތައް ރަޖިސްޓްރީކުރުން މަޖުބޫރުކުރުމަށް އިންޑިއާ ސަރުކާރުން ނިންމައިފިއެވެ.

މިދިޔަ މަހު ބޭއްވުނު 69 ވަނަ ޑްރަގްސް ކޮންސަލްޓޭޓިވް ކޮމިޓީ (ޑީ.ސީ.ސީ) ގެ ބައްދަލުވުމުގައި މިކަމާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކޮށްފައެވެ. މި ބައްދަލުވުމުގެ ރިޕޯޓްތަކުން އެނގޭ ގޮތުގައި، މި ނިންމުން ތަންފީޒު ކުރުމުގެ ކުރިން އަމަލުކުރާނެ އުސޫލުތަކެއް ކަނޑައެޅުމަށްޓަކައި ސަބް-ޕެނަލެއް އެކުލަވާލުމަށް ވަނީ ލަފާދީފައެވެ.

މި ފިޔަވަޅު އަޅަން ނިންމާފައިވަނީ ފަހަކަށް އައިސް އިންޑިއާގައި ސައްހަނޫން ބޭސް އުފައްދާ މިންވަރު އިތުރުވެފައިވާ ދަނޑިވަޅެއްގައެވެ. މިގޮތުން، އުއްތަރަ ޕްރަދޭޝްގައި ފޭކު "ކައިމޯރަލް ފޯޓޭ" އާއި "ގަޑްސެފް ޕްލަސް" އަތުލައިގަނެ ދެ މީހަކު ހައްޔަރުކޮށްފައިވާއިރު، "މައުންޖާރޯ" ޕެންގެ ނަމުގައި ފޭކު އުފެއްދުންތަކެއް އުފައްދާ ބަޔަކުވެސް ވަނީ އަތުލައިގަނެފައެވެ. މި މައްސަލަތަކުގައި ބޭސް ބަންދުކުރާ ކަރުދާސްތަކާއި ލޭބަލްތައް އަސްލާ އެއްގޮތަށް ތައްޔާރުކޮށްފައި ހުރިކަން ވަނީ ފާހަގަކުރެވިފައެވެ.

މި ނިންމުމާ ގުޅޭގޮތުން ބޭސް އުފައްދާ ސިނާއަތުގެ ބައެއް ތަޖުރިބާކާރުން ކަންބޮޑުވުން ފާޅުކުރެއެވެ. އެ ފަރާތްތަކުން ބުނާ ގޮތުގައި، ޕްރިންޓިންގް މާކެޓަކީ ވަރަށް ބޮޑު މާކެޓަކަށް ވެފައި، އެ ފަރާތްތަކުން އެހެނިހެން ސިނާއަތްތަކަށްވެސް މަސައްކަތްކޮށްދޭތީ، ހަމައެކަނި ބޭހުގެ ގާނޫނުގެ ދަށުން އެންމެން ކޮންޓްރޯލް ކުރުމަކީ ދަތި ކަމަކަށް ވާނެއެވެ. ނަމަވެސް، އަސްލާ ދާދި އެއްގޮތް ފޭކު އުފެއްދުންތައް ބާޒާރުގައި ދައުރުވުމަކީ ކުންފުނިތަކުގެ އަބުރަށް ލިބޭ ބޮޑު ގެއްލުމަކަށް ވާތީ، މިއީ ރަނގަޅު މިސްރާބަކަށް އެޅޭ ފިޔަވަޅެއް ކަމަށްވެސް އެ ފަރާތްތަކުން ގަބޫލުކުރެއެވެ.

ޑީ.ސީ.ސީ ބައްދަލުވުމުގައި ހުށަހެޅިފައިވަނީ ބޭސް ބަންދުކުރާ ކާޓަން، ލޭބަލް، ފޮއިލް އަދި ބޭހާ ގުޅޭ މައުލޫމާތު ކަރުދާސް އުފައްދާ ފަރާތްތަކަށް އޮންލައިން ރަޖިސްޓްރޭޝަން ފްރޭމްވޯކެއް ތައާރަފްކުރުމަށެވެ. މިކަމަށް އެކުލަވާލާ ސަބް-ކޮމިޓީން 1940 ވަނަ އަހަރުގެ "ޑްރަގްސް އެންޑް ކޮސްމެޓިކްސް އެކްޓް" އާއި 1945 ވަނަ އަހަރުގެ "ޑްރަގްސް ރޫލްސް" އަށް ގެންނަންޖެހޭ ބަދަލުތަކާ ގުޅޭގޮތުން ރިޕޯޓެއް ތައްޔާރުކުރާނެއެވެ.

މީގެ އިތުރުން، މިފަދަ ރަޖިސްޓްރޭޝަނެއް ހިންގުމަކީ އަމަލީ ގޮތުން ކުރެވިދާނެ ކަމެއް ނޫން ނަމަ، ބޭސް ބަންދުކުރާ ސާމާނު ނަހަމަ ގޮތުގައި ބޭނުންކުރުން ހުއްޓުވުމަށް އެޅިދާނެ އެހެނިހެން ފިޔަވަޅުތަކާ ގުޅޭގޮތުންވެސް މި ކޮމިޓީން ލަފާދޭން ޖެހެއެވެ.

އިންޑިއާ ސަރުކާރުގެ އަމާޒަކީ ބޭސް އުފެއްދުމުގެ މުޅި ސިލްސިލާ ވަރުގަދައަށް މޮނިޓަރކޮށް، ސިއްހަތަށް ނުރައްކާވާ ފަދަ ފޭކު ބޭސްތައް ބާޒާރަށް ނުކުތުން ހުއްޓުވުމެވެ. ސަބް-ކޮމިޓީގެ ރިޕޯޓު ލިބުމުން، ޑީ.ސީ.ސީ އިން މިކަމުގައި ކުރިއަށް ދާނެ ގޮތެއް ނިންމާނެއެވެ.