މިދިޔަ ސްކޫލް ބަންދާ ދިމާކޮށް އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ދިޔަ ގިނަ އަދަދެއްގެ ދިވެހިން އެނބުރި ރާއްޖެ އަންނަން ފަށާފައިވާއިރު، ބަލިތަކުން ރައްކާތެރިވުމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އިލްތިމާސްކޮށްފިއެވެ.

އެ އެޖެންސީން ސޯޝަލް މީޑިއާގައި އާންމުކުރި މެސެޖެއްގައި ބުނެފައިވަނީ، އުމްރާގެ އަޅުކަމަށްފަހު ރާއްޖެ އަންނަ މީހުންގެ ކިބައިން ރޯގާގެ އަލާމާތްތައް ފެންނަނަމަ، ބަލި އިތުރަށް ފެތުރުނުނުދިނުމަށްޓަކައި ގޭގައި އަމިއްލައަށް ރައްކާތެރިކަމުގެ ފިޔަވަޅުތައް އެޅުމަކީ ނުހަނު މުހިންމު ކަމެއް ކަމަށެވެ.

ހާއްސަކޮށް، ރޯގާޖެހި ކެއްސާނަމަ މީހުން އެއްވެ އުޅޭ ތަންތަނަށް ނުދިއުމަށާއި، ކުޑަކުދިންނާއި އުމުރުން ދުވަސްވީ މީހުންގެ އިތުރުން ދިގު މުއްދަތަކަށް ބަލިތަކަށް ފަރުވާ ހޯދަމުންދާ މީހުންނާ ބައްދަލުނުކުރުމަށް އެޗްޕީއޭއިން ވަނީ އިރުޝާދު ދީފައެވެ.

އުމްރާއިން އެނބުރި އަންނަތާ 14 ދުވަހުގެ ތެރޭގައި ހުން އައުމާއި، ކެއްސުމުގެ އިތުރުން ނޭވާލާން އުނދަގޫވުން ނުވަތަ މޭގައި ރިއްސުން ފަދަ ސީރިއަސް އަލާމާތެއް ފެނިއްޖެނަމަ، ލަސްނުކޮށް ޑޮކްޓަރެއްގެ މަޝްވަރާ ހޯދަންޖެހެއެވެ. އަދި ޑޮކްޓަރަށް ދައްކާއިރު، އެއީ އުމްރާގެ ދަތުރަށްފަހު އެނބުރި އައި ފަރާތެއްކަން ސިއްހީ އެހީތެރިންނަށް ބުނެދިނުމަކީ ބަލި ދެނެގަތުމަށް ލިބޭނެ ވަރަށް ބޮޑު އެހީއެކެވެ.

ބަލިން އަވަހަށް ފަސޭހަވުމަށްޓަކައި ގިނައިން ދިޔާތަކެތި ބޭނުންކުރުމާއި، ރަނގަޅަށް އަރާމުކުރުމަށް އެޗްޕީއޭއިން ވަނީ އެދިފައެވެ. ހުން ގަދަވާނަމަ ގައިގައި ފެންހޭކުމާއި، ޕެރެސެޓަމޯލް ފިޔަވައި އެހެން އެއްވެސް ބޭހެއް ޑޮކްޓަރެއްގެ ލަފާގެ މަތިން މެނުވީ ބޭނުން ނުކުރުމަށްވެސް އެ އެޖެންސީން ވަނީ ހަނދާންކޮށްދީފައެވެ. މީގެ އިތުރުން، އާންމު ސާފުތާހިރުކަމަށް ސަމާލުކަން ދިނުމުގެ ގޮތުން ގިނަގިނައިން ސައިބޯނިލައިގެން އަތްދޮވުމާއި، ކެއްސާ ކިނބިހި އަޅާއިރު ޓިޝޫއަކުން ނޭފަތާއި އަނގަ ނިވާކުރުމަށްފަހު އެ ޓިޝޫ ރައްކާތެރިގޮތުގައި ނައްތާލުމަކީ ބަލި ފެތުރުން ހުއްޓުވުމަށް އެޅޭނެ މުހިންމު ފިޔަވަޅެކެވެ.

މިދިޔަ ސްކޫލް ބަންދާ ދިމާކޮށް 5،000 އަށްވުރެ ގިނަ ދިވެހިން ވަނީ އުމްރާއަށް ގޮސްފައެވެ.