ދިވެހިންގެ މެދުގައި މަގުބޫލު ޗުއްޓީ މަންޒިލެއް ކަމަށްވާ ތައިލެންޑުގެ ފޫކެޓުން އިންޑިއާގެ ވެރިރަށް ދިއްލީއަށް ދަތުރުކުރި އެއާ އިންޑިއާގެ ފްލައިޓަކަށް، ވައިގެ ތެރޭގައި ދިމާވި ގަދަ ޓާބިއުލެންސް ނުވަތަ ވައިގެ ލޮޅުމެއްގެ ސަބަބުން 12 މީހަކަށް އަނިޔާވެއްޖެއެވެ.

މިއަދު ހިނގި މި ހާދިސާއާ ގުޅޭގޮތުން އެއާ އިންޑިއާއިން ބުނީ، ފްލައިޓް އޭއައި-2379 ދަތުރުކުރަމުން ދަނިކޮށް ދިމާވި މި ލޮޅުމުގެ ސަބަބުން ބޯޓުގެ އުސްމިނަށް ވަގުތީ ބަދަލެއް އައި ކަމަށެވެ. ނަމަވެސް، ބޯޓުގެ ކެޕްޓަނާއި ފްލައިޓް ކްރޫއިންގެ މަސައްކަތުން ބޯޓު ވަނީ ރައްކާތެރިކަމާއެކު ދިއްލީގެ އެއާޕޯޓަށް ޖައްސައިފައެވެ. ބޯޓު ޖެއްސުމަށްފަހު ހުރިހާ ފަސިންޖަރުންނާއި ކްރޫއިން ވަނީ އަމާންކަމާއެކު ބޯޓުން ފައިބައިފައެވެ.

މި ހާދިސާގައި އަނިޔާވެފައިވަނީ 10 ފަސިންޖަރުންނަށާއި ދެ ކްރޫއިންނަށެވެ. އެއާލައިނުން ހާމަކުރި ގޮތުގައި އެއްވެސް މީހަކަށް ސީރިއަސް އަނިޔާއެއް ލިބިފައެއް ނުވެއެވެ. އެހެންނަމަވެސް، ރައްކާތެރިކަމުގެ ފިޔަވަޅެއްގެ ގޮތުން، އަނިޔާވި ހުރިހާ އެންމެން ވެސް ވަނީ އިތުރު ތަހުލީލުތައް ހެދުމަށާއި ބޭނުންވާ ސިއްހީ ފަރުވާ ދިނުމަށް މެދަންތާ ހޮސްޕިޓަލަށް ގެންގޮސްފައެވެ.

އެއާޕޯޓުން ފެނުނު މަންޒަރުތަކަށް ބަލާއިރު، ބޯޓު ޖެއްސި ވަގުތު އެއާޕޯޓުގެ ޓާމިނަލް ކައިރީގައި އެމްބިއުލާންސްތައް ތައްޔާރީ ހާލަތުގައި އޮތެވެ. ބައެއް ފަސިންޖަރުން ފީލްޗެއަރުގައި ބޯޓުން ބާލާފައިވާއިރު، ބައެއް މީހުންގެ ބޮލުގައި ބެންޑޭޖު އަޅާފައި ހުރި މަންޒަރު ވެސް ފެނިފައިވެއެވެ.

އެއާ އިންޑިއާގެ ތަރުޖަމާނު ވިދާޅުވީ، ކުދިކުދި އަނިޔާތައް ލިބުނު ފަރާތްތަކަށް ބޭނުންވާ އެހީތެރިކަމާއި އަޅާލުން އެއާލައިންގެ ފަރާތުން ފޯރުކޮށްދެމުންދާ ކަމަށެވެ. ވައިގެ ތެރޭގައި ދިމާވާ މިފަދަ ހާދިސާތަކަކީ މޫސުމީ ބަދަލުތަކުގެ ސަބަބުން މަދުން ނަމަވެސް ދިމާވާ ކަންކަމެވެ.