އިންޑިއާގެ ބައެއް ސްޓޭޓްތަކުގައި ހަލުވިކަމާއެކު ފެތުރެމުންދާ، ބްރެއިން އިންފްލެމޭޝަން ނުވަތަ ސިކުނޑި ދުޅަވާ ނުރައްކާތެރި "ޗަންދީޕޫރާ" ވައިރަހުގެ ސަބަބުން މަދުވެގެން 22 ކުޑަކުދިން މަރުވުމާ ގުޅިގެން، އެ ގައުމުގެ ސިއްހީ އިދާރާތަކުން ހާއްސަ ގައުމީ ރެސްޕޮންސް ޓީމެއް ހަރަކާތްތެރިކުރުވާން ފަށައިފިއެވެ.

އިންޑިއާގެ ސިއްހަތާ ބެހޭ ވުޒާރާއިން ނެރުނު ބަޔާނެއްގައި ބުނެފައިވަނީ، މި ހާއްސަ ޓީމުން މަސައްކަތް ކުރާނީ ބަލި އެންމެ ބޮޑަށް ފެތުރެމުންދާ ހުޅަނގު އިންޑިއާގެ ގުޖަރާތު އަދި ރާޖަސްތާން ސްޓޭޓްގެ ސިއްހީ އިދާރާތަކަށް ބޭނުންވާ ފަންނީ އެހީތެރިކަން ފޯރުކޮށްދިނުމަށެވެ.

ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ހާމަކޮށްފައިވާ މައުލޫމާތަށް ބަލާއިރު، ޗަންދީޕޫރާ ވައިރަހަކީ މޫސުމީ ވިއްސާރައިގެ ދުވަސްވަރު ވެލިމެހި (ސޭންޑްފްލައި)، މަދިރި އަދި އުނި ފަދަ ސޫފިތަކުގެ ޒަރީއާއިން ފެތުރޭ ވައިރަހެކެވެ. މި ވައިރަހުގެ ސަބަބުން އިންސާނާގެ ސިކުނޑި ދުޅަވެ، ހާއްސަކޮށް ކުޑަކުދިންގެ ސިއްހަތަށް ފުރާނައަށް ނުރައްކާވާ ފަދަ ބޮޑެތި ގެއްލުންތަކެއް ކުރިމަތިވެއެވެ.

ގުޖަރާތުގެ ސިއްހަތާ ބެހޭ ވަޒީރު ޕްރަފުލް ޕަންޝެރިޔާ ވިދާޅުވި ގޮތުގައި، އެ ސްޓޭޓުން ބަލީގެ އަލާމާތްތައް ފެނުނު 184 ބަލިމީހެއްގެ ލޭގެ ޓެސްޓުތައް މިހާތަނަށް ވަނީ ހަދާފައެވެ. އޭގެ ތެރެއިން 35 މީހަކު މި ވައިރަހަށް ޕޮޒިޓިވްވެފައިވާއިރު، އެ ސްޓޭޓުން ގިނަ އަދަދެއްގެ ކުޑަކުދިން މަރުވެފައިވާކަން ވަނީ ކަށަވަރުވެފައެވެ.

މީގެ އިތުރުން، އަވައްޓެރި ރާޖަސްތާން ސްޓޭޓުންވެސް ފާއިތުވި މަހުގެ ތެރޭގައި މި ވައިރަހުގެ ސަބަބުން ދެ ކުއްޖަކު މަރުވެފައިވާކަން ވަނީ ރިޕޯޓުކޮށްފައެވެ.

މި ނުރައްކާތެރި ބަލި އިތުރަށް ފެތުރުނަނުދީ ކޮންޓްރޯލް ކުރުމަށްޓަކައި އިންޑިއާގެ މަރުކަޒީ ސަރުކާރާއި ސްޓޭޓް ސަރުކާރުތަކުން ގުޅިގެން މިހާރު ދަނީ ރައްކާތެރިކަމުގެ ހާއްސަ ފިޔަވަޅުތަކެއް އަޅަމުންނެވެ. މިގޮތުން ބަލި ޖެހިފައިވާ ސަރަހައްދުތަކުގައި ސިއްހީ ފަރުވާ ދިނުމާއި، ބަލި ދެނެގަތުމުގެ މަސައްކަތްތައް ކުރިއަށްވުރެ ވަރުގަދަކޮށްފައިވާ ކަމަށް އެ ގައުމުގެ ސިއްހީ އިދާރާތަކުން ބުނެއެވެ.