މިއަދުގެ ފަތިހުގެ ވަގުތެއްގައި އިންޑޮނޭޝިއާއަށް އައި ރިކްޓަރ މިންގަނޑުން 7.7 ގެ ބާރުގަދަ ބިންހެލުމެއްގައި ފަސް މީހުން މަރުވެފައިވާ ކަމަށް އެ ގައުމުގެ އޮފިޝަލުން ހާމަކޮށްފިއެވެ.

އީސްޓް ނޫސާ ޓެންގާރާ ޕްރޮވިންސްގެ ގަވަރުނަރު އިމަނުއަލް މެލްކިއަޑޭސް ލަކަ ލީނާ ޕްރެސް ކޮންފަރެންސެއްގައި ވިދާޅުވި ގޮތުގައި، މި ފަސް މީހުން މަރުވީ ބިންހެލުން އައި ވަގުތު ނިދާފައި ތިއްބާ އިމާރާތްތަކުން ވެއްޓުނު ގާބުރިތަކުގެ ދަށުވެގެންނެވެ. މި ބިންހެލުން އައިސްފައިވަނީ އިންޑޮނޭޝިއާގެ ފްލޯރެސް އައިލެންޑަށް އެ ގައުމުގެ ގަޑިން ފަތިހު 05:00 ހާއިރުއެވެ.

އިންޑޮނޭޝިއާގެ މީޓިއޮރޮލޮޖީ، ކްލައިމެޓޮލޮޖީ އެންޑް ޖިއޯފިޒިކްސް އެޖެންސީން ބުނި ގޮތުގައި މި ބިންހެލުން އައިސްފައިވަނީ 15 ކިލޯމީޓަރު އަޑިއަށެވެ. ބިންހެލުމަށްފަހު ސުނާމީގެ އިންޒާރު ނެރުނު ނަމަވެސް، ތިން ގަޑިއިރު ފަހުން އެ އިންޒާރު ވަނީ އަނބުރާ ގެންގޮސްފައެވެ. ނަމަވެސް، ބިންހެލުމަށްފަހު ބާރުގަދަ ލޮޅުންތަކެއް (އާފްޓަރޝޮކްސް) އަންނަމުންދާ ކަމަށާއި، އޭގެ ތެރޭގައި 6.1 ގެ ބާރުމިނުގެ ލޮޅުމެއް ހިމެނޭ ކަމަށް ރިޕޯޓްކޮށްފައިވެއެވެ.

މައުމެރޭ ބަނދަރު ސަރަހައްދުން ފެންނަ ވީޑިއޯތަކުން ފެންނަ ގޮތުގައި، ފެރީއަށް އަރަން މަޑުކޮށްގެން ތިބި މީހުންގެ ބޯމައްޗަށް ޓާމިނަލް އިމާރާތުގެ ބޮޑެތި ކޮންކްރީޓްގަނޑުތައް ވަނީ ވެއްޓިފައެވެ. އަދި ފެރީއަށް އަރަން އޮތް ހަރުގަނޑު ކަނޑައިގެން ދިއުމުގެ ސަބަބުން ބައެއް މީހުން ކަނޑަށް ވެއްޓުނު މަންޒަރުވެސް ފެނިފައިވެއެވެ. ސުނާމީގެ އިންޒާރާއެކު ގިނަ އަދަދެއްގެ ބަޔަކު ސައިކަލުތަކުގައި އެއްގަމަށް ދަތުރުކުރަމުންދިޔަ މަންޒަރުވެސް ވަނީ ރިޕޯޓްކޮށްފައެވެ.

އެ ސަރަހައްދަކީ ފަރުބަދަ ގިނަ، ދުރު ސަރަހައްދަކަށް ވުމުން ލިބުނު ގެއްލުންތަކުގެ ފުރިހަމަ ތަފްސީލު ހޯދުމަށް ވަގުތު ނަގާނެ ކަމަށް ބެލެވެއެވެ. އިންޑޮނޭޝިއާގެ ގައުމީ ކާރިސާތަކާ ބެހޭ އެޖެންސީ (ބީއެންޕީބީ) އިން ވަނީ ރައްޔިތުން ހަމަޖެހިގެން ތިބުމަށާއި، އަތިރިމަތީ ސަރަހައްދުތަކާ ދުރުގައި ތިބުމަށް އިލްތިމާސްކޮށްފައެވެ. އަދި ރެނދުލާފައިވާ ނުވަތަ ގެއްލުން ލިބިފައިވާ އިމާރާތްތަކަށް ނުވަނުމަށްވެސް ވަނީ އަންގާފައެވެ.

ނަގޭކެއޯ ސަރަހައްދުން ގާތްގަނޑަކަށް 2،000 ރައްޔިތުން ވަނީ ރައްކާތެރި ސަރަހައްދުތަކަށް ބަދަލުކޮށްފައެވެ. ސިއްކާގެ ތަލިބޫރާ އަވަށުގެ ރައްޔިތެއް ކަމަށްވާ އާނޯލްޑް ވެލިއަންޓޯ ބީބީސީއަށް ކިޔައިދިން ގޮތުގައި، ބިންހެލުން އައިއިރު އޭނާ އޮތީ ނިދާފައެވެ. ވަރަށް ބާރުގަދަ ލޮޅުމަކާއެކު ހޭލެވުމުން އޭނާ ވަގުތުން ދަރިފުޅުގެ ކޮޓަރިއަށް ދިޔަ ކަމަށާއި، ބޭރަށް ނުކުތްއިރު އަތިރިމައްޗާ ކައިރީގައި އުޅޭ މީހުން ފަރުބަދަތަކާ ދިމާލަށް ދަނީ ކަމަށް އޭނާ ބުންޏެވެ. އަދި އެ ވަގުތު ކަނޑުގެ ލޮނުގަނޑު ވަރަށް ބޮޑަށް ހިކިފައިވާ ކަމަށާއި، އެކަމުގެ ސަބަބުން މީހުން ވަރަށް ބޮޑަށް ބިރުގަތް ކަމަށް އޭނާ ކިޔައިދިނެވެ.

މިހާރުވެސް ސާޗް އެންޑް ރެސްކިއު ޓީމުތަކުން ދަނީ އިމާރާތްތަކުގެ ދަށުގައި ތާށިވެފައި ތިބި މީހުން ހޯދުމުގެ މަސައްކަތް ކުރަމުންނެވެ. ގިނަ ރައްޔިތުން އަދިވެސް ތިބީ ގެއަށް ވަންނަން ނުކެރި ބޭރުގައެވެ. އިންޑޮނޭޝިއާ ސަރުކާރުން ބުނީ ގެއްލުންތަކުގެ އަގުވަޒަންކުރުމުގެ މަސައްކަތް މިހާރު ކުރިއަށްދާ ކަމަށެވެ.