މާލޭގެ މާފަންނުގައި ހިންގަމުންދާ ރެސްޓޯރެންޓެއްގެ ތެރޭގައި އިން އަންހެނަކަށް ހަމަލާދީ، އެތަނުގެ މުދަލަށް ގެއްލުންދިން މައްސަލައެއްގައި 19 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން މައުލޫމާތު ދިން ގޮތުގައި، މާފަންނު އަވަށުގައި ހުންނަ ރެސްޓޯރެންޓެއްގެ ތެރޭގައި ހަމަނުޖެހުމެއް ހިނގައި މާރާމާރީއެއް ހިންގަމުންދާ ކަމުގެ ރިޕޯޓް ފުލުހުންނަށް ލިބިފައިވަނީ 22 އޮގަސްޓް 2026 ވީ ދުވަހުގެ ރޭގަނޑު 23:00 އެހައިކަންހާއިރުއެވެ.

މި ހާދިސާއާ ގުޅިގެން މިހާތަނަށް ބެލިބެލުމުން އެނގިފައިވާ ގޮތުގައި، ރެސްޓޯރެންޓް ތެރޭގައި ހިނގި މި ހަމަނުޖެހުމުގައި، އެތަނުގައި އިން އަންހެނަކަށް ފިރިހެނަކު ވަނީ ޖިސްމާނީ ގޮތުން އަނިޔާކޮށް ހަމަލާދީފައެވެ. އަދި އެ މަންޒަރު ފެނިގެން އެ ހަމަނުޖެހުން ކޮންޓްރޯލްކޮށް ހުއްޓުވުމަށް މަސައްކަތްކުރި ބައެއް އާންމުންނަށްވެސް އޭނާ ވަނީ ހަމަލާދީފައެވެ. މީގެ އިތުރުން، އެ ހާދިސާގެ ތެރޭގައި އެ ރެސްޓޯރެންޓުގެ ދޮރަށް ހަމަލާދީ ބޮޑެތި ގެއްލުންތަކެއް ވަނީ ދީފައެވެ.

ފުލުހުން އިތުރަށް ހާމަކުރި ގޮތުގައި، މި މާރާމާރީގެ ތެރޭގައި އެ ރެސްޓޯރެންޓުގައި މަސައްކަތްކުރަމުންދިޔަ އަންހެން މުވައްޒަފެއްގެ ބޮލަށްވެސް ވަނީ ހަމަލާދީފައެވެ. މި ހަމަލާގެ ސަބަބުން އެ މުވައްޒަފުގެ ބޯ ދުޅަވެ، އެކިވަރުގެ އަނިޔާތައް ލިބިފައިވެއެވެ.

މި މައްސަލައާ ގުޅިގެން ކުށުގެ ވެށިން ހައްޔަރުކޮށްފައިވަނީ 19 އަހަރުގެ ދިވެހި ޒުވާނެކެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށާއި، މި މައްސަލައިގައި އަޅަންޖެހޭ ޤާނޫނީ ފިޔަވަޅުތައް އެޅުމަށްޓަކައި މޯލްޑިވްސް ޕޮލިސް ސަރވިސްއިން ދަނީ މި މައްސަލަ އިތުރަށް ތަހުގީގު ކުރަމުންނެވެ.