އިންޑިއާގެ އެންމެ މުއްސަނދި މީހުންގެ ލިސްޓުގެ އެއްވަނަ މަގާމު ގޯތަމް އަދާނީ އަލުން ހޯދައިފިއެވެ.

އާންމުކޮށްފައިވާ "އެމް3އެމް ހުރުން އިންޑިއާ ރިޗް ލިސްޓު 2026" އިން ދައްކާ ގޮތުގައި، އަދާނީ ވަނީ މުކޭޝް އަމްބާނީ ފަހަތަށް ޖައްސާލުމަށްފަހު އިންޑިއާގެ އެންމެ މުއްސަނދި މަހުޖަނުގެ މަގާމު ކަށަވަރުކޮށްފައެވެ. މިއާއެކު އިންޑިއާގައި ޑޮލަރު ބިލިއަނަރުންގެ އަދަދު ވަނީ ރެކޯޑު މިންވަރަކަށް އަރައި، 391 އަށް އިތުރުވެފައެވެ.

މި ލިސްޓުގައި މަދުވެގެން 1,000 ކްރޯޑު ރުޕީސް (104.3 މިލިއަން އެމެރިކާ ޑޮލަރު) ގެ މިލްކިއްޔާތެއް ހުރި 1,810 މީހުން ހިމެނެއެވެ. މި މައުލޫމާތުތަކަކީ އޮގަސްޓު 2026 ގެ ނިޔަލަށް އެ ފަރާތްތަކުގެ މާލީ ތަނަވަސްކަމަށް ބަލައި ތައްޔާރުކޮށްފައިވާ މައުލޫމާތުތަކެކެވެ.

އިންޑިއާގެ މުއްސަނދިންގެ ތެރޭގައި ސައިންސާއި ޓެކްނޮލޮޖީ، އާޓިފިޝަލް އިންޓެލިޖެންސް (އޭއައި)، ފާމަސޫޓިކަލްސް އަދި ފިންޓެކް ދާއިރާއިން ކުރިއަރަމުން އަންނަ އައު މަހުޖަނުން ގިނަވަމުންދާކަން މި ރިޕޯޓުން ފާހަގަކުރެވެއެވެ.

ލިސްޓުގެ އެއްވަނައިގައިވާ ގޯތަމް އަދާނީ އަދި އޭނާގެ އާއިލާގެ މުއްސަނދިކަން އުޅެނީ 9.23 ލައްކަ ކްރޯޑު ރުޕީސް (96.1 ބިލިއަން ޑޮލަރު) ގައެވެ. އަދާނީ ގްރޫޕުގެ ކުންފުނިތަކުގެ ހިއްސާގެ އަގުތައް މަތިވުމާއެކު އޭނާގެ މިލްކިއްޔާތަށް ވަނީ 13 އިންސައްތައިގެ ކުރިއެރުމެއް އައިސްފައެވެ.

ދެވަނައިގައިވާ މުކޭޝް އަމްބާނީ އަދި އޭނާގެ އާއިލާގެ މުއްސަނދިކަމަކީ 8.63 ލައްކަ ކްރޯޑު ރުޕީސް (89.9 ބިލިއަން ޑޮލަރު) އެވެ.

ރިލަޔަންސް އިންޑަސްޓްރީޒްގެ ދަށުން ހިންގާ ޖިއޯ އާއި ރީޓޭލް އަދި އިއާދަކުރެވިނިވި ހަކަތައިގެ ދާއިރާއިން އަމްބާނީ އަންނަނީ ބޮޑެތި އިންވެސްޓްމަންޓްތަކެއް ކުރަމުންނެވެ.

މި ލިސްޓުގެ ތިންވަނައަށް ބޮޑު ކުރިއެރުމެއް ހޯދާފައިވަނީ ދަގަނޑުގެ ވިޔަފާރިކުރާ އަރުސެލޯމިއްތަލްގެ ލަކްޝްމީ ނިވާސް މިއްތަލްއެވެ.

އޭނާގެ މުއްސަނދިކަން 3.39 ލައްކަ ކްރޯޑު ރުޕީސް (35.3 ބިލިއަން ޑޮލަރު) އަށް އަރާފައިވާއިރު، ހަތަރުވަނައިގައި ވަކްސިން އުފައްދާ ސީރަމް އިންސްޓިޓިއުޓްގެ ސައިރަސް އެސް ނާވާލާ (31.6 ބިލިއަން ޑޮލަރު) ހިމެނެއެވެ.

އިންޑިއާގެ އެންމެ މުއްސަނދި އަންހެންބޭފުޅާގެ މަގާމު އެޗްސީއެލް ޓެކްނޮލޮޖީސްގެ ޗެއާޕާސަން ރޮޝްނީ ނާދަރު މަލްހޯތުރާ ވަނީ ދަމަހައްޓާފައެވެ. އޭނާ ހިމެނެނީ 29.1 ބިލިއަން ޑޮލަރުގެ މިލްކިއްޔާތާއެކު މުޅި ލިސްޓުގެ ފަސްވަނައިގައެވެ.

މީގެ އިތުރުން ގްލޯބަލް ގްރޫޕްތަކާއި ޓެކްނޮލޮޖީ އަދި ބޭސްވެރިކަމުގެ ދާއިރާއިން ކުރިއަރާފައިވާ ކުމާރު މަންގަލަމް ބިރްލާ، ދިލީޕް ސަންގާވީ، އަޒީމް ޕްރޭމްޖީ، އަނިލް އަގަރްވާލް އަދި ސަމީރު މެހެތާ ވެސް ވަނީ ގަދަ 10 ގެ ތެރޭގައި ހިމެނިފައެވެ.

މި ރިޕޯޓުން އެނގޭ ގޮތުގައި އިންޑިއާގެ އިގްތިސާދީ ކުރިއެރުމާއެކު އުފެދޭ މުއްސަނދިކަން ހަމައެކަނި ގަދީމީ އާއިލީ ވިޔަފާރިތަކަށް ބަރޯސާވުމުގެ ބަދަލުގައި، އައު ޓެކްނޮލޮޖީއާއި ސިއްހީ ދާއިރާގެ ވިޔަފާރިތަކަށް ފުޅާވަމުންދާކަން ފާހަގަކުރެވެއެވެ.