މެލޭޝިޔާގެ ކުރީގެ ބޮޑުވަޒީރު ޑރ. މަހާތީރު މުޙައްމަދުގެ އަނބިކަނބަލުން ޓުން ޑރ. ސިތީ ހަސްމާ މުޙައްމަދު ޢަލީ، ޢުމުރުފުޅުން 100 އަހަރުފުޅުގައި އަވަހާރަވެއްޖެއެވެ.

އެކަމަނާ އަވަހާރަވީ މިއަދު ހެނދުނުގެ ވަގުތެއްގައި މެލޭޝިޔާގެ ނެޝަނަލް ހާޓް އިންސްޓިޓިއުޓް (އައިޖޭއެން) ގައެވެ. ސިތީ ހަސްމާ އަވަހާރަވިކަން އެކަމަނާގެ ދަރިކަލުން ތަން ސްރީ މޮޚްޒާނީ މަހާތީރު ވަނީ ކަށަވަރުކޮށްދެއްވާފައެވެ.

މިއަހަރުގެ ޖުލައި މަހުގެ 12 ވަނަ ދުވަހު 100 ވަނަ އުފަންދުވަސް ފާހަގަކުރެއްވި ސިތީ ހަސްމާއަކީ މެލޭޝިޔާގެ ތާރީޚުގައި ފާހަގަކޮށްލެވޭ ފުރަތަމަ މެލޭ ނަސްލުގެ އަންހެން ޑޮކްޓަރުންގެ ތެރެއިން އެކަކެވެ.

އެކަމަނާ ސިންގަޕޫރުގެ ކިންގް އެޑްވަރޑް ކޮލެޖް އޮފް މެޑިސިންއިން ބޭސްވެރިކަމުގެ ދާއިރާއިން ތަޢުލީމް ޙާޞިލްކުރައްވައި ދަސްވެނިވެވަޑައިގަތީ 1955 ވަނަ އަހަރުއެވެ. ދަސްވެނިވެވަޑައިގަތުމަށްފަހު މެލޭޝިޔާގެ ހެލްތު މިނިސްޓްރީއާ ގުޅިވަޑައިގެން، ކެޑާ ހިމެނޭހެން ޤައުމުގެ ތަފާތު ސަރަޙައްދުތަކުގައި ޢާންމު ޞިއްޙަތާއި، މައިންނާއި ކުޑަކުދިންގެ ޞިއްޙަތު ރައްކާތެރިކުރުމުގެ ދާއިރާއިން އަގުހުރި ޚިދުމަތްތަކެއް ވަނީ ކުރައްވާފައެވެ.

ސިތީ ހަސްމާ، މަހާތީރު މުޙައްމަދާ ކާވެނިބައްލަވައިގެންނެވީ 1956 ވަނަ އަހަރުއެވެ. މި ކާވެނިފުޅަށް 7 ބޭފުޅުން ލިބިވަޑައިގެންފައިވާއިރު، އޭގެ ތެރޭގައި އިޖުތިމާޢީ ޙަރަކާތްތެރިޔާ އަދި ލިޔުންތެރިޔާ މާރީނާ މަހާތީރާއި، ކެޑާގެ ކުރީގެ ޗީފް މިނިސްޓަރު މުޚްރިޒް މަހާތީރު ހިމެނިވަޑައިގަންނަވައެވެ.

މީގެއިތުރުން ސިތީ ހަސްމާއާއި މަހާތީރުގެ ބަދަހި އަދި ލޯބިވެތި ގުޅުމަކީ ޢާންމުންގެ މެދުގައި މެލޭޝިޔާގައި އަބަދުވެސް ނަމޫނާ ގުޅުމެއްގެ ގޮތުގައި ފާހަގަކުރެވުނު ގުޅުމެކެވެ.