ރަސްމާލެ މަޝްރޫޢާ ގުޅޭގޮތުން ކުރީގެ ހޯމް މިނިސްޓަރު އަދި އަދާލާތު ޕާޓީގެ ކުރީ ރައީސް ޝައިޚް އިމްރާން ދެއްކެވި ވާހަކަތަކަށް ބާރަށު ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރު އިބްރާހީމް ޝުޖާޢު ވަރަށް ބޮޑަށް ފާޑުވިދާޅުވެއްޖެއެވެ.

ޤައުމުގެ ދިފާޢުގައި ތެދުވަން ޖެހިއްޖެ ކަމަށް ވިދާޅުވެ ޝައިޚް އިމްރާން ދެއްކެވި ވާހަކަތަކާއި ގުޅިގެން ބާރަށު ދާއިރާގެ މެންބަރު ޝުޖާޢު އެކްސްގައި ކުރެއްވި ޕޯސްޓެއްގައި ވިދާޅުވީ،ރަސްމާލޭގެ 500 ހެކްޓަރުގެ ބިން (ދެބައިކުޅަ އެއްބައި) ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިން މައްސަލައިގައި ނިއުޅެމުންދާ އަޑިނޭނގޭ ކަންކަމޭ ވިދާޅުވެ ޝައިޚް އިމްރާން ވާހަކަދެއްކެވުމަކީ ވަރަށް ގޮތްކުޑަ ކަމެއް ކަމަށެވެ. އަދި ދިވެހިރާއްޖޭގެ ފަހުގެ ތާރީޚުގައި ވެރިއަކު ޤައުމަށްވި އެންމެ ބޮޑު ޚިޔާނާތާއި ޣައްދާރުވުން ހިނގާފައިވަނީ ޝައިޚް އިމްރާންވެސް ހިމެނިވަޑައިގެންނެވި ނިމިދިޔަ އެމްޑީޕީގެ ސަރުކާރުގައި ކަމަށް ޝުޖާޢު ވިދާޅުވިއެވެ.

"ދިވެހިރާއްޖޭގެ ކަނޑުގެ ބައެއް ވަގަށް ސިއްރު ސިޓީއަކުން ވިއްކާލީ. ދިވެހިރާއްޖޭގެ މިނިވަންކަމާއި އިސްތިޤުލާލާގުޅޭ މިބޮޑު ޚިޔާނާތް ޤައުމަށްވީ ޝައިޚް ކެބިނެޓްގައި އިންނަވައިގެންނޭ އިނގޭތޯ ކީއްވެތޯ ޤައުމުގެ ހައްޤުގައި ނުތެދުވީ؟" ޝުޖާޢު ސުވާލުކުރެއްވިއެވެ.

މީގެއިތުރުން، ޝައިޚް އިމްރާން މިހާރު ރާއްޖެއިން ބޭރުގައި (ބެންކޮކްގައި) ހުންނެވުމުން ޤައުމުގެ ކަންކަމާ މެދު ދެކެވަޑައިގަންނަވާ ގޮތާއި، ރާއްޖޭގައި ތިބެގެން ޤައުމުގެ ޙާލަތާމެދު ވިސްނާ ވިސްނުމާ ބޮޑު ތަފާތެއް ހުންނާނެ ކަމަށް ޝުޖާޢު ވިދާޅުވިއެވެ. އަދި ރައީސް ޑރ. މުޙައްމަދު މުޢިއްޒަކީ ވަޠަންދެކެ ލޯބިވެވަޑައިގަންނަވާ، ޤައުމަށް އިޚްލާސްތެރި ވެރިއެއް ކަމަށް ވިދާޅުވަމުން، މާލެ ވަޑައިގަތުމަށް ޝައިޚް އިމްރާނަށް އޭނާ ގޮވާލެއްވިއެވެ.

ރަސްމާލެ މަޝްރޫޢާ ގުޅޭގޮތުން ޝައިޚް އިމްރާން ކުރެއްވި ޕޯސްޓެއްގައި ވިދާޅުވެފައިވަނީ، ރަސްމާލޭގެ 500 ހެކްޓަރުގެ ބިން (ދެބައިކުޅަ އެއްބައި) ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަކީ އަޑިނޭނގޭ ނިންމުމެއް ކަމަށާއި، މި ހާލަތުގައި ވެސް ޤައުމު ދިފާޢުކުރަން ނުކުންނަންޖެހޭ ކަމަށެވެ. އަދި ރާއްޖޭގެ ފަހުގެ ތާރީޚަށް ބަލާއިރު ދީނާއި ޤައުމަށް ޣަދަރުވެރިވުމުގެ ނަތީޖާ ރައީސް ޑރ. މުޙައްމަދު މުޢިއްޒަށްވެސް ހިތިވާނެ ކަމަށް އޭނާ ވިދާޅުވެފައިވެއެވެ.