ޔުކްރޭނާއި އީރާން ހިމެނޭ ސަރަހައްދީ ނުތަނަވަސްކަމާއި ހަނގުރާމަތަކުގެ ސަބަބުން، ކުރިއަށް އޮތް މަސްތަކުގައި ދުނިޔެއަށް ކާބޯތަކެތީގެ ބޮޑު ދަތިކަމެއް ނުވަތަ ކްރައިސިސްއެއް ކުރިމަތިވެދާނެކަމުގެ އިންޒާރު އިންޑިއާގެ ހާރިޖީ ވަޒީރު އެސް. ޖައިޝަންކަރު ދެއްވައިފިއެވެ.

އެމެރިކާގެ ނިއުޔޯކްގައި ބޭއްވި ހަރަކާތެއްގައި ވާހަކަފުޅު ދައްކަވަމުން ޖައިޝަންކަރު ވަނީ، މިހާރުވެސް ދުނިޔެއަށް ކުރިމަތިވެފައިވާ ގަސްކާނާގެ ބޮޑު ދަތިކަމުގެ އިތުރުން ކާބޯތަކެތީގެ މި ދަތިކަން ކުރިމަތިވުމަކީ "ގްލޯބަލް ސައުތު" ނުވަތަ ތަރައްގީވަމުން އަންނަ ގައުމުތަކުގެ އިގްތިސާދަށް "ވަރަށް ވަރަށް ނުތަނަވަސް" އަދި ނުރައްކާތެރި ހާލަތެއް ކަމަށް ސިފަކުރައްވާފައެވެ.

ޖައިޝަންކަރު ފާހަގަކުރެއްވި ގޮތުގައި، ހަނގުރާމަތަކުގެ ސަބަބުން ދަނޑުވެރިކަމަށް ބޭނުންވާ ގަސްކާނާ އުފައްދާ މައިގަނޑު ގައުމުތަކުން މުދާ އެކްސްޕޯޓްކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

އަދި ކަޅުކަނޑުގެ ސަރަހައްދުން ގުޅުންހުރި މައިގަނޑު ގައުމުތަކުން ކާބޯތަކެތި ފޮނުވުމުގައި ދަތިތަކާ ކުރިމަތިލާންޖެހުމަކީ ދުނިޔޭގެ ކާބޯތަކެތީގެ ރައްކާތެރިކަމަށް އޮތް ބޮޑު ގޮންޖެހުމެކެވެ.

މީގެ އިތުރުން ތެލުގެ އަގުތަކާއި މާލީ ދާއިރާއަށް އަންނަ ބަދަލުތަކުގެ ސަބަބުން، ތަރައްގީވަމުން އަންނަ ގައުމުތަކަށް ކުރިމަތިވެފައިވާ އިގްތިސާދީ ފިއްތުންތައް ދަނީ އިތުރަށް ބޮޑުވަމުންނެވެ.

އޭނާ އިތުރަށް ވިދާޅުވީ، ދުނިޔޭގެ ބޮޑެތި ބާރުތަކުން އަމިއްލަ މަސްލަހަތު އެކަނި އިސްނުކޮށް، ދުނިޔޭގެ އެހެން ގައުމުތަކުގެ އަސާސީ ބޭނުންތަކާއި އިގްތިސާދީ ރައްކާތެރިކަމަށް ސަމާލުކަން ދޭންޖެހޭ ކަމަށެވެ. އަދި މިފަދަ ނުތަނަވަސްކަންކަމުގެ ސަބަބުން ތަރައްގީވަމުން އަންނަ ގައުމުތަކުގެ އިގްތިސާދީ ހަމަޖެހުމަށް ބޮޑެތި ގޮންޖެހުންތަކެއް ކުރިމަތިވެ، ބައެއް ގައުމުތަކަށް އަމިއްލަ އިގްތިސާދީ ސިޔާސަތުތައް ދެމެހެއްޓުމަށް ނުހަނު އުނދަގޫވާނެ ކަމަށްވެސް އިންޑިއާގެ ހާރިޖީ ވަޒީރު ވަނީ ވިދާޅުވެފައެވެ.