ޗައިނާގެ ޕީޕަލްސް ރިޕަބްލިކް އުފެދުނުތާ 77 އަހަރު ފުރުނު އުފާވެރި މުނާސަބަތުގެ ހެޔޮއެދުންތަކާއި ތަހުނިޔާ، އެ ގައުމުގެ ރައީސް ޝީ ޖިންޕިންގ އަދި ސަރުކާރާއި ރައްޔިތުންނަށް ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ފޮނުއްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ، ދިވެހިރާއްޖެއާއި ޗައިނާއާ ދެމެދު އޮތީ ދެގައުމުގެ މެދުގައި އޮތް އިހުތިރާމާއި، އިތުބާރާއި، ތަރައްގީއާއި ފާގަތިކަމަށް އޮތް އުންމީދުތަކުގެ މައްޗަށް ބިނާވެފައިވާ ފުން އަދި ބަދަހި އެކުވެރިކަމެއް ކަމަށެވެ.

އަދި ރާއްޖޭގެ ތަރައްގީގެ ދަތުރުގައި ޗައިނާއަކީ އަބަދުވެސް ސާބިތުކަމާއެކު އޮތް ބައިވެރިއެއްކަން ފާހަގަކުރައްވައި، ދެގައުމުގެ މެދުގައި އޮތް އެއްބާރުލުމުގެ ސަބަބުން ދިވެހި ރައްޔިތުންނަށް މުހިންމު ފުރުސަތުތަކެއް ފަހިވަމުންދާކަމަށް އެމަނިކުފާނު ވިދާޅުވިއެވެ.

ކުރިއަށް އޮތް ތަނަށް ބަލާއިރު، ދެގައުމުގެ މެދުގައި އޮތް "ކޮމްޕްރެހެންސިވް ސްޓްރެޓީޖިކް ކޯޕަރޭޓިވް ޕާޓްނަޝިޕް" އިތުރަށް ވަރުގަދަކޮށް، ބިލެޓަރަލް ގުޅުން އާ އުސްމިންތަކަކަށް ގެންދިއުމަށް ދިވެހިރާއްޖެއިން ސާބިތުކަމާއެކު ދެމިއޮންނާނެކަމުގެ ޔަގީންކަން ރައީސް މުއިއްޒު ދެއްވިއެވެ.

އެމަނިކުފާނުގެ މެސެޖު ނިންމަވާލައްވަމުން، ދެގައުމުގެ ރައްޔިތުންގެ މެދުގައި އޮތް އެކުވެރިކަން ދުވަހެއް ދުވަހަކަށް ވަރުގަދަވެ، ޗައިނާއަށް އިތުރު ފާގަތިކަމާއި ކުރިއެރުން ލިބުމަށް އެދިވަޑައިގެންނެވިއެވެ.