ދިވެހިރާއްޖޭގެ ޕްރޮސެކިއުޓާ ޖެނެރަލްގެ އޮފީހާއި ރަޝިއަން ފެޑެރޭޝަންގެ ޕްރޮސެކިއުޓާ ޖެނެރަލްގެ އޮފީހާ ދެމެދު ގުޅުން ބަދަހިކޮށް، އެއްބާރުލުން ދިނުމުގެ މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރައްވާފައިވަނީ ރަޝިއާގެ ކަޒާންގައި މިހާރު ކުރިއަށްދާ ޝަންހާއީ ކޯޕަރޭޝަން އޮގަނައިޒޭޝަން (އެސްސީއޯ) ގެ މެންބަރު ގައުމުތަކުގެ ޕްރޮސެކިއުޓާ ޖެނެރަލުންގެ 24 ވަނަ ބައްދަލުވުމުގެ ހަވާސާގައެވެ. މި ބައްދަލުވުމުގައި ބައިވެރިވެވަޑައިގަތުމަށް ޕްރޮސެކިއުޓާ ޖެނެރަލް އަލްއުސްތާޛު ޢައްބާސް ޝަރީފާއި، ޕީޖީ އޮފީހުގެ އިސް ވަފުދެއް މިވަގުތު ތިއްބެވީ ރަޝިއާގައެވެ.

ޕީޖީ އޮފީހުން މައުލޫމާތު ދެއްވި ގޮތުގައި، މި އެއްބަސްވުމުގައި ސޮއިކުރެއްވީ ޕްރޮސެކިއުޓާ ޖެނެރަލް އައްބާސް ޝަރީފާއި، ރަޝިއަން ފެޑެރޭޝަންގެ ޕްރޮސެކިއުޓާ ޖެނެރަލް މިސްޓަ އެލެގްޒެންޑާ ގުޓްސަންއާ ދެމެދު ބޭއްވެވި ރަސްމީ މަޝްވަރާތަކަށް ފަހުގައެވެ.

ދެ ގައުމުގެ ޕްރޮސެކިއުޓާ ޖެނެރަލްގެ އޮފީހުގެ ދެމެދުގައި ސޮއިކުރެވުނު މި އެއްބަސްވުމުގެ މައިގަނޑު މަގުސަދަކީ ދެ އޮފީހުގެ ދެމެދުގައި ޕްރޮފެޝަނަލް ދިރާސާތައް ކުރުމާއި، މުވައްޒަފުން ތަމްރީނުކުރުމަށް އެހީތެރިވެދިނުމެވެ. އަދި ޝަރުއީ އަދި ގާނޫނީ ދާއިރާއިން އިލްމާއި ތަޖުރިބާ ބަދަލުކުރުމުގެ އިތުރުން، ދެފަރާތުން އެއްބަސްވާ މުހިންމު އެކި ދާއިރާތަކުން ގުޅުން ބަދަހިކޮށް އެހީތެރިކަން ފޯރުކޮށްދިނުމަށް މި އެއްބަސްވުމުގެ ދަށުން ވަނީ އޮނިގަނޑެއް އެކުލަވާލެވިފައެވެ.

މި އެއްބަސްވުމުގެ ސަބަބުން ރާއްޖޭގެ ޕްރޮސެކިއުޓާ ޖެނެރަލްގެ އޮފީހުގެ މަސައްކަތްތައް އިތުރަށް ހަރުދަނާވެ، ބައިނަލްއަގުވާމީ ފެންވަރުގައި ތަޖުރިބާ ހާސިލުކުރުމަށް ފުރުސަތުތައް ފަހިވެގެންދާނެ ކަމަށް ޕީޖީ އޮފީހުން ދެކެއެވެ.