ލާމަރުކަޒީ ނިޒާމުގެ ތެރެއިން ކައުންސިލްތައް ބާރުވެރިކުރުވުމާ ގުޅޭގޮތުން އިދިކޮޅު އެމްޑީޕީން މިހާރު ދައްކަމުންދާ ވާހަކަތަކަކީ އެ ޕާޓީން ކައުންސިލްތަކަށް ކުރާ ފުރައްސާރައެއް ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.

ޝުޖާއު މިފަދައިން ވިދާޅުވީ، ސޯޝަލް މީޑިއާގައި ހިއްސާކުރެއްވި މެސެޖެއްގައެވެ. އޭނާ ފާހަގަކުރެއްވި ގޮތުގައި، ކައުންސިލްތަކަށް ދަރަންޏަށް ޒިންމާވާ ގޮތަށް ފައިސާ ހޯދުމާއި، ވިޔަފާރި ކުންފުނި އުފެއްދުމުގެ އިތުރުން ފަޅުރަށްރަށް ބޭނުންކުރުން ފަދަ ގާނޫނީ ބޮޑެތި އިޚްތިޔާރުތަކެއް ލިބިފައިވީ ނަމަވެސް، ވޭތުވެދިޔަ އެމްޑީޕީގެ ވެރިކަމުގައި އެ ފުރުސަތުތައް ފަހިކޮށްދެވިފައެއް ނުވެއެވެ. އަދި ވެރިކަމުގައި ތިބިއިރު ކައުންސިލްތަކަށް އިންވެސްޓްމަންޓްތައް ހޯދައިނުދެވުނު ޕާޓީއަކަށް މިހާރު އެކަން ކުރެވޭނެ ކަމާމެދު އޭނާ ވަނީ ސުވާލު އުފައްދަވާފައެވެ.

އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑޭ) އަށް އަމާޒުކުރައްވައި ޝުޖާއު ވިދާޅުވީ، 19 ވަނަ ރައްޔިތުންގެ މަޖިލީހުގައި ކައުންސިލްތަކުގެ މާލީ މިނިވަންކަމާ ގުޅޭގޮތުން އެންމެ އަޑުއުފުއްލެވި އެއް ބޭފުޅަކީ ވައްޑޭ ކަމަށްވާއިރު، އެމްޑީޕީން ބޭއްވި އިންވެސްޓްމަންޓް ފޯރަމުން އޭނާ ފެނިވަޑައިނުގަތުމުން ހައިރާންކަން ލިބުނު ކަމަށެވެ. މީގެއިތުރުން އެމްޑީޕީގެ ސިޔާސަތުތަކުގައި ފުށުއެރުންތަކެއް ހުރިކަންވެސް އޭނާ ފާހަގަކުރެއްވިއެވެ.

މީގެއިތުރުން، އެމްޑީޕީގެ ވެރިކަމުގައި މާލެ ސިޓީ ކައުންސިލް ހިންގުމަށް އެކި ގޮތްގޮތުން ހުރަސްއެޅި ކަމަށް ޝުޖާއު ތުހުމަތުކުރެއްވިއެވެ. އެގޮތުން ރައްޔިތުންނަށް ބޭނުންވާ ބޯހިޔާވަހިކަމުގެ މަޝްރޫއުތައް ކުރިއަށްގެންދިއުމަށާއި، ކައުންސިލުން ލޯނު ނަގައިގެން ކުންފުނިތައް މެދުވެރިކޮށް ތަރައްގީގެ ކަންކަން ހިންގުމަށް އޭރުގެ ސަރުކާރުން ހުއްދަ ނުދީ ހިފެހެއްޓި ކަމަށް ވިދާޅުވިއެވެ.

ޝުޖާއު މި މޭރުމުން ފާޑުވިދާޅުވެފައި މިވަނީ، އެމްޑީޕީން އިސްނަގައިގެން "ރަށްވެހި ތަރައްގީ" ގެ ނަމުގައި ބޭއްވި ފޯރަމެއްގައި، ރަށްރަށުގެ ނިންމުންތައް އަމިއްލައަށް ނިންމައި އިގްތިސާދީ ގޮތުން ފުދުންތެރި ބަޔަކަށް ކައުންސިލްތައް ހެދުމަކީ އެ ޕާޓީގެ މައިގަނޑު އަމާޒު ކަމަށް ބުނެފައިވާ ދަނޑިވަޅެއްގައެވެ.