ކުޅިވަރާއި ހަށިހެޔޮކަމާ ބެހޭ ވުޒާރާއިން އަތޮޅުތަކުގައި ތަރައްގީކުރާ އައުޓްޑޯ ޖިމްތަކުގެ ތެރެއިން 3 ރަށެއްގެ ޖިމް މަސައްކަތް އެއްކޮށް ނިންމާލައިފިއެވެ.

ކުޅިވަރާއި ހަށިހެޔޮކަމާ ބެހޭ ވުޒާރާއިން މިއަދު ބުނީ މި އައުޓްޑޯ ޖިމްތަކަކީ ނެޝަނަލް ފިޓްނަސް ޕްލޭނާ އެއްގޮތަށް ރާއްޖޭގެ މީހުން ދިރިއުޅޭ ހުރިހާ ރަށެއްގައި އައުޓްޑޯ ޖިމް ގާއިމު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ރިޔާސީ ވައުދުފުޅު ފުއްދެވުމަށް ޤާއިމްކުރި ޖިމްތަކެއް ކަމަށެވެ.

ރައްޔިތުންގެ މެދުގައި ކަސްރަތު ކުރުމުގެ ޝައުގުވެރިކަން އިތުރުކޮށް، ދުޅަހެޔޮ މުޖުތަމައުއެއް ބިނާކުރުމުގެ މަގުސަދުގައި ސަރުކާރުން ކުރިއަށްގެންދާ މި މަޝްރޫއުގެ ދަށުން، މި ޖިމްތަކުގައި ގާއިމުކޮށްފައިވަނީ ފެންވަރު ރަނގަޅު، ޒަމާނީ އިކުއިޕްމަންޓްތައް ކަމަށް އެޗްޑީސީން މަޢުލޫމާތު ދީފައިވެއެވެ.

އެގޮތުން އަލަށް ޖިމް ގާއިމުކޮށް ނިމިފައިވާ 3 ރަށަކީ ތ. ބުރުނި، ތ. މަޑިފުށި އަދި ތ. ވިލުފުއްޓެވެ.

ސްޕޯޓްސް މިނިސްޓްރީން ބުނީ މިހާތަނަށް މަސައްކަތް ނިމިފައިވާ ރަށްތަކުގެ ޖިމްތައް އެ ރަށެއްގެ ކައުންސިލާ ހަވާލުކުރުމަށް ވާންޖެހޭ ތައްޔާރީތައް މިހާރު ވަމުންދާ ކަމަށެވެ.