މިނިސްޓަރ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އަޙްމަދު ޝިޔާމް
މިނިސްޓަރ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އަޙްމަދު ޝިޔާމް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމަށް 3 އަހަރު ފުރުނުއިރު ހޯއްދަވާފައިވާ ބޮޑެތި ކުރިއެރުންތަކަކީ ދިވެހި އެންމެހައި ރައްޔިތުންނާއި މުޅި ޤައުމަށް ލިބުނު ބޮޑު ކާމިޔާބީއެއް ކަމަށް، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސް އަދި މިނިސްޓަރ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވެއްޖެއެވެ.

ސަރުކާރަށް 3 އަހަރު (156 ހަފްތާ) ފުރުމުގެ މުނާސަބަތުގައި ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި މިނިސްޓަރު ޝިޔާމް ވިދާޅުވީ، ރައީސް މުޢިއްޒު ވެރިކަމާ ހަވާލުވެވަޑައިގެންނެވި ދަނޑިވަޅަކީ އިޖުތިމާޢީ، އިޤްތިޞާދީ އަދި މާލީ ގޮތުން ރާއްޖެ އިންތިހާއަށް ނާޒުކު ފައްތަރެއްގައި އޮތް ދުވަސްވަރެއް ކަމަށެވެ. އެގޮތުން ޤައުމުގެ އިޖުތިމާޢީ ފޭރާން ވީދި، މާލީ ނިޒާމު ދަރަނީގެ ނުރައްކާތެރި ދަންތުރައެއްގައި ތާށިވެފައި އޮތްއިރު، އޭރުގެ ސިޔާސަތުތައް ފެއިލްވުމުގެ ސަބަބުން ޤައުމުގެ ސިޔާސީ ހަމަޖެހުންވެސް އޮތީ މުޅިންހެން ގެއްލިފައި ކަމަށް އޭނާ ފާހަގަކުރެއްވިއެވެ.

ނަމަވެސް، ރައީސް މުޢިއްޒުގެ ޙިކުމަތްތެރި އަދި ދުރުވިސްނޭ ސިޔާސަތުތަކުގެ ސަބަބުން މިއަދު އެ ނާއުންމީދީ ޙާލަތު ވަރަށް ބޮޑަށް ބަދަލުކޮށްލައްވާފައިވާ ކަމަށް ޝިޔާމް ވިދާޅުވިއެވެ. އެގޮތުން އިދިކޮޅު ފަރާތްތައް ސިއްސުވާލެއްވުމަށްފަހު، ރާއްޖެ ދަރަނީގެ ނުރައްކަލުން ސަލާމަތްކުރައްވައި، ޤައުމުގައި ސިޔާސީ ހަމަޖެހުމާއި އަމާންކަން އަލުން ޤާއިމުކޮށްދެއްވާފައިވާ ކަމަށް މިނިސްޓަރު ބަޔާންކުރެއްވިއެވެ.

މީގެއިތުރުން، ދުޅަހެޔޮ މުޖުތަމަޢެއް ބިނާކުރުމަށް ޤައުމީ ފެންވަރުގައި ހަރުދަނާ ފިޔަވަޅުތަކެއް އެޅެމުންދާކަން ފާހަގަކުރައްވަމުން ޝިޔާމް ވިދާޅުވީ، ރައްޔިތުން އެދޭފަދަ ފުދުންތެރި އިޤްތިޞާދެއް ބިނާކުރުމަށްޓަކައި ބޮޑެތި އިންވެސްޓްމަންޓްތަކަށް ފަހި މާހައުލެއް ޤާއިމުކުރެވިފައިވާ ކަމަށެވެ. އަދި ރާއްޖޭގެ މައިގަނޑު އިޤްތިޞާދީ ދާއިރާތަކަށް ކުރިމަތިވެފައިވާ ގޮންޖެހުންތަކަށް ސަރުކާރުން މިހާރު ގެންނަވަމުންދަނީ ދެމެހެއްޓެނިވި، ވަށާޖެހޭ ޙައްލުތަކެއް ކަމަށްވެސް އޭނާ ވިދާޅުވިއެވެ.





ވެރިކަމުގެ ފުރަތަމަ 3 އަހަރުގެ ތެރޭގައި މިފަދަ މުހިންމު ކާމިޔާބީތަކެއް ހާސިލުކުރެއްވޭނީ އިޚްލާޞްތެރި، ތެދުވެރި އަދި ޤާބިލު ލީޑަރަކަށް ކަމަށް ވިދާޅުވަމުން ޝިޔާމް ފާހަގަކުރެއްވީ، ރައީސް މުޢިއްޒުގެ ބަސްފުޅާއި ޢަމަލުފުޅުން ސާބިތުވަނީ އެމަނިކުފާނަކީ ކާމިޔާބު ސިޔާސީ ޒަޢީމެއް ކަމެވެ.

މިނިސްޓަރު ޝިޔާމްގެ ޕޯސްޓް ނިންމަވާލައްވާފައިވަނީ ކާމިޔާބު 156 ވަނަ ހަފްތާގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި ލޮބުވެތި ދިވެހި ރައްޔިތުންނަށް ހެޔޮއެދުންތައް އަރިސްކުރައްވަމުންނެވެ.



ކިޔުންތެރިންގެ ހިޔާލު