މާދަމާއަކީ ޝައުބާން މަހުގެ 30 ވަނަ ދުވަސް ކަމަށާއި މި އަހަރުގެ ރަމަޟާން މަހުގެ ފުރަތަމަ ދުވަހަކީ 24 އޭޕްރިލް 2020 ވާ ހުކުރު ދުވަސް ކަމުގައި އިސްލާމިކް މިނިސްޓްރީން އިއުލާނުކޮށްފިއެވެ.

މި އަހަރުގެ ރަމަޟާން މަހުގެ ހަނދު ސާބިތުކުރުމުގެ ގަރާރު އިއްވަވައިދެއްވަމުން އިސްލާމިކް އެފެއާޒް މިނިސްޓަރު ޑރ. އަހްމަދު ޒާހިރު އަލީ ވިދާޅުވީ މިއަދު ރާއްޖޭގެ އިތުރުން އިސްލާމީ އެހެން އެއްވެސް ގައުމަކަށްވެސް ރަމަޟާން މަހުގެ ހަނދު ފެނިފައި ނުވާކަމަށެވެ. އަދި މިއަދުގެ އިރު އޮއްސުނު އިރު ރާއްޖޭގެ އެއްވެސް ހިސާބަކަށް ހަނދު ފެންމަތީގައި ހުންނާނެ ކަމަކަށް އިތުބާރު ހުރި ފަލަކީ ހިސާބަކުން ވެސް ނުދައްކާ ކަމަށް އިސްލާމިކް މިނިސްޓްރީގެ ނިންމުމުގައި ވެއެވެ.

އެހެންކަމުން މާދަމާއަކީ މި އަހަރުގެ ޝައުބާން މަހުގެ 30 ވަނަ ދުވަސް ކަމަށާއި މި އަހަރުގެ ރަމަޟާން މަހުގެ ފުރަތަމަ ދުވަހަކީ 24 އޭޕްރީލް ވާ ހުކުރު ދުވަސް ކަމުގައި ކަނޑައަޅާފައިވާކަމަށް ގަރާރު އިއްވަވައިދެއްވަމުން އިސްލާމިކް މިނިސްޓަރ ވިދާޅުވިއެވެ.

ކޯވިޑް-19 ގެ ސަބަބުން މާލެ ލޮކްޑައުން ކޮށްފައި ވުމުގެ ސަބަބުން ހަނދު ސާބިތުކުރުމުގެ ޖަލްސާ ބާއްވާފައި ވަނީ ވީޑިއޯ ކޮންފަރެންސް މެދުވެރިކޮށެވެ.