ގައުމު އިސްލާހު ކުރުމަށް "ޑްރީމް ޓީމެއް" އެކުލަވާލައިފައިވާކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވުމުން، ޖުމްހޫރީ ޕާޓީގެ ނާއިބު ރައީސް އަހުމަދު ސައުދު، މަލާމާތުގެ ރާގެއްގައި އުމަރަށް ރައްދުދެއްވައިފިއެވެ.

ދިވެހި ނެޝަނަލް އެކްޝަން (ޑީއެންއޭ)ގެ ނަމުގައި އިސްލާހީ ހަރަކާތެއް އިފްތިތާހުކުރުމަށް ބޭއްވި ޖަލްސާގައި އުމަރު ނަސީރު ވިދާޅުވީ ރާއްޖޭގެ ވެރިކަމަށް އެކި ބޭފުޅުން ވަޑައިގެންފިކަމަށާއި އެކަމަކު އެމީހުންނަށް އެދެވޭ ބަދަލެއް ގެނެވިފައި ނުވާ ކަމަށެވެ. އެހެންކަމުން ޤައުމު އިސްލާހުކުރުމަށް "ޑްރީމް ޓީމެއް" މިހާރު އެކުލަވާލައިފައިވާކަމަށް އުމަރު ވިދާޅުވިއެވެ.

އުމަރުގެ ވާހަކަތަކަށް ރައްދުދެއްވަމުން ޖުމްހޫރީ ޕާޓީގެ ނާއިބު ރައީސް އަހުމަދު ސައުދު ވިދާޅުވީ އުމަރުގެ ޑްރީމް ޓީމް ވާނީ ހަމަ ޑްރީމްއަކަށް ނުވަތަ ހުވަފެނަކަށެވެ. އަދި އުމަރުގެ ޓީމަށް ރައްޔިތުންވެސް، ސަރުކާރުން އަދި އިދިކޮޅުންވެސް މީގެ ކުރިން ޖާގަ ދިންކަންވެސް ސައުދު ފާހަގަކުރެއްވިއެވެ.

މީގެއިތުރުން އުމަރު ކުރައްވާ މި މަސައްކަތަކީ 2023 އަށް ކޮންމެވެސް ދިމާލަކުން ޖާގައެއް ހޯދަން ކުޅޭ "ޑްރީމް" އެއްތޯވެސް ސައުދު ސުވާލުކުރައްވާފައިވެއެވެ.

Thi Dream Team vaanee hama dream akah. Thi team ah rayyithun Sarukaarun ves adhi Opposition in ves jaaga dhin noonthoa? Thee 2023 ah konmeves dhimaalakun jaaga eh hoadhan kulhey dream eh tho?? pic.twitter.com/x9y50ivSHi

— Ahmed Saud (@ammadaysaud) March 4, 2021

އުމަރު ނަސީރާއި ބައެއް ސިޔާސީ ބޭފުޅުން އިސްކޮށް ތިއްބަވައިގެން ދިވެހި ނެޝަނަލް އެކްޝަން (ޑީއެންއޭ)ގެ ނަމުގައި ސިޔާސީ ހަރަކާތެއް ފަށާފައިވާއިރު، އެ ހަރަކާތުގައި ކުރީގެ ޚަރިޖީ ވަޒީރު ދުންުޔާ މައުމޫނު ވެސް އިސް ދައުރެއް އަދާކުރަށްވައެވެ.