ކ. ތުލުސްދޫން ދެ ބިދޭސީއަކު ކޯވިޑް-19 އަށް ޕޮޒިޓިވް ވެއްޖެއެވެ.

ތުލުސްދޫ ހެލްތު ސެންޓަރުން ފޭސްބުކްގައި ކޮށްފައިވާ ޕޯސްޓެއްގައި ބުނެފައި ވަނީ މިމަހުގެ 24 ވަނަ ދުވަހު އެރަށުން ސާމްޕަލް ނެގި މީހުންގެ ތެރެއިން މިހާތަނަށް ދެމީހަކު ކޯވިޑް-19 އަށް ފައްސިވެފައިވާ ކަމަށެވެ. މިދަނޑިވަޅުގައި އެންމެހާ ރައްޔިތުންގެ އެއްބާރުލުން ވަރަށް ބޮޑަށް ބޭނުންވާ ކަމަށް ހެލްތު ސެންޓަރުން ބުނެފައި ވެއެވެ.

މިއަދު ރާއްޖެ އިން 73 މީހަކު ކޯވިޑް-19 އަށް ފައްސިވެފައިވާ ކަމަށް އެޗްޕީއޭ އިން ވަނީ ބުނެފައެވެ. އޭގެތެރޭގައި ތުލުސްދޫ އިން ފައްސިވި މީހުން ހިމެނޭކަމެއް ނުވަތަ ނޫންކަމެއް އެޗްޕީއޭ އިން ކަށަވަރު ކޮށެއް ނުދެއެވެ.



ތުލުސްދޫ އޮތީ މިހާރު މޮނިޓަރިންގެ ހާލަތުގައެވެ. އެހެންކަމުން އެރަށަށް މީހުން އަރައި ފޭބުން ވަނީ މަނާކޮށްފައެވެ.

މާލެ އާއި ތުލުސްދޫ ފިޔަވައި މިހާތަނަށް ކޯވިޑް-19 ފެނިފައިވާ މީހުން ދިރިއުޅޭ ރަށް ރަށަކީ ށ.ނަރުދޫ އާއި ހއ. އުލިގަމެވެ.