ކޯވިޑް-19 އަށް ޕޮޒިޓިވް ވެފައިވާ ފަރާތްތަކާ ޑައިރެކްޓް ކޮންޓެކްޓްވީ ބައެއް ވަޒީރުން މިވަގުތު ތިއްބެވީ އައިސޮލޭޝަންގައި ކަމަށް ފަތުރުވެރިކަމާބެހޭ ވަޒީރު ޢަލީ ވަޙީދު ވިދާޅުވެއްޖެއެވެ.

ނޭޝަނަލް އިމަރޖެންސީ އޮޕަރޭޝަން ސެންޓަރ ގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ފަތުރުވެރިކަމާބެހޭ ވަޒީރު އަލީ ވަހީދު ވިދާޅުވީ، މި ނުރައްކާތެރި ހާލަތުގައި ހުރިހާ ފަރާތްތަކަކުން ވެސް މަސައްކަތް ކުރަމުން އަންނަނީ ކޮންމެ ވަގުތެއްގައި ވެސް ކަރަންޓީނަށް ދާންޖެހިދާނެކަން އެނގި ތިބެ ކަމަށެވެ.

މި ހާލަތުގައި މަސައްކަތް ކުރަނީ އެކަކު އެކަހެރިކުރަން ޖެހޭ އިރަށް، އިތުރު މީހަކު މަސައްކަތަށް ނުކުންނަ އުސޫލުން ކަމުގައި އަލީވަހީދު ވިދާޅުވިއެވެ.

"މިވަގުތު އެބަތިއްބެވި ބައެއް ވަޒީރުން ވެސް އައިސޮލޭޝަންގައި. ފަސްޓް ޑައިރެކްޓް ކޮންޓެކްޓާ ގުޅިގެން ހަމަ މަސައްކަތަށް ނުނުކުމެވި ގޭގައި މަޑުކުރަން ޖެހިފައިި." އަލީ ވަހީދު ވިދާޅުވި އެވެ.

އެހެންކަމުން ކެބިނެޓް ތަރުތީބުވެފައި ވަނީ އެންމެން އެކުގައި މަސައްކަތަށް ނުނުކުމެވޭނެ ޙާލަތެއް ކުރިމަތި ނުވާނެ ގޮތަކަށް ކަމަށް މިނިސްޓަރު ވިދާޅުވި އެވެ.

"އިރާދަކުރެއްވިއްޔާ އަޅުގަނޑުމެން ނެތިއްޔާ ދެން ހުންނަ މީހާ ހުންނާނެ. ވަޒީރުންގެ މަޖިލީހާއެކު ރައީސް ސަރުކާރު ތަރުުތީބުކޮށްފައި ވަނީ މި ހާލަތް ކިތަންމެ ނުރައްކާތެރި ހާލަތަކަށް ދިޔަޔަސް މެނޭޖު ކުރެވޭނެ ގޮތަށް،" ކަމަށް އަލީ ވަޙީދު ވިދާޅުވި އެވެ.

މިވަގުތު ނޭޝަނަލް އެމަޖެންސީ އޮޕަރޭޝަން ސެންޓަރުގައި މަސައްކަތް ކުރައްވަނީ ފަތުރުވެރިކަމާބެހޭ ވަޒީރުގެ އިތުރުން ދިފާޢީ ވަޒީރު މާރިޔާ އަހްމަދު ދީދީ އާއި، ދާޚިލީ ވަޒީރު އިމްރާން އަބްދުﷲ އާއި، ހެލްތު މިނިސްޓަރު އަބްދުﷲ އަމީން އާއި ޕްލޭނިން މިނިސްޓަރު މުހައްމަދު އަސްލަމް ކަމަށް ޢަލީ ވަޙީދު ވިދާޅުވިއެވެ.

ވަޒީރު ޢަލީ ވަޙީދު ވިދާޅުވީ އެންއީއޯސީގައި މަސައްކަތަށް ނުކުމެ ތިބި ކޮންމެ މީހަކީ ވެސް، ބަލީގެ ޑައިރެކްޓް ކޮންޓެކްޓަކަށް ވެގެން ހިނގައިދާނެ މީހެއް ކަމަށެވެ. އެގޮތުން ރޭ ތުލުސްދޫ އިން ދެ މީހަކު ޕޮޒިޓިވްވުމާ ގުޅިގެން، ފެނަކައިގެ ސިވިލް އިންޖިނިއަރަކު ކަރަންޓީނަށް ދާންޖެހިފައިވާ ކަމަށް ވެސް ވަޒީރު ވިދާޅުވި އެވެ.

މީގެ ކުރިން އިހްސާން ފިހާރައިގެ ދެ މުވައްޒަފަކު ކޮވިޑް-19 އަށް ޕޮޒިޓިވްވުމާ ގުޅިގެން ޔޫތު މިނިސްޓަރު އަހްމަދު މަހްލޫފް ހުންނެވީ ސެލްފް އައިސޮލޭޝަންގަ އެވެ. މަހްލޫފަކީ އެ ފިހާރައިގެ ޑެލިވަރީގައި ވޮލަންޓިއާ ކޮށް އުޅުއްވި ބޭފުޅެކެވެ.

އަދި އިކޮނޮމިކް މިނިސްޓަރު ފައްޔާޒް އިސްމާއީލް ވެސް ސެލްފް އައިސޮލޭޝަންގައި ހުންނެވި ކަމަށް ވަނީ ވިދާޅުވެފަ އެވެ. މީގެއިތުރުން އިތުރު އެހެން ވަޒީރަކު އައިސޮލޭޝަންގައި ހުންނެވިކަން ކަށަވަރު ވެފައެއް ނުވެއެވެ.

މިއަދު އަލީ ވަހީދު ވިދާޅުވީ މިހާރު ރާއްޖެ މިއޮތީ އެންމެ ނުރައްކާތެރި ހާލަތުގައި ކަމަށާއި، ކުރިއަށް ދެން އޮތީ ރިކަވަރީ ފޭސް ކަމަށާއި، މި އަޑިގަނޑުން މިޤައުމު އަރައިގަންނާނެ ކަމުގެ ޔަގީންކަން ސަރުކާރަށް އެބައޮތް ކަމަށެވެ.

މިހާތަނަށް ރާއްޖެއިން 220 މީހަކަށް ބަލި ޖެހިފައިވާއިރު، ގިނަ މީހުން ޕޮޒިޓިވް ވެފައި ވަނީ މާލެއިންނެވެ.