މާލެ ސަރަޙައްދުގައި ކޯވިޑް ވެކްސިންގެ ފުރަތަމަ ޑޯޒް ނުޖަހާ މީހުންނަށް ވެކްސިން ޖެހުމަށް އަލުން ހުޅުވާލން ނިންމާފައިވާ ކަމަށް އެޗްއީއޯސީން ވިދާޅުވެއްޖެއެވެ.

މާލެ ސަރަޙައްދުގައި ކޯވިޑްގެ ފުރަތަމަ ޑޯޒް ދޭން ފެށީ ފެބްރުއަރީ މަހުގެ 1 ވަނަ ދުވަހުއެވެ. އަދި މިމަހުގެ 15 ވަނަ ދުވަހު މާލެ ސަރަޙައްދުގައި ވެކްސިން ދިނުން ވަނީ މެދުކަނޑާލާފައެވެ. 15 ވަނަ ދުވަހުގެ ފަހުން ވެކްސިން ދެނީ ޚާއްސަ ހާލަތްތަކުގައި ފުރަތަމަ ޑޯޒްގެ ވެކްސިން ދޭންޖެހޭ މީހުންނަށް އެކަންޏެވެ. ނަމަވެސް އަތޮޅުތަކުގައި ހުރި ވެކްސިން ސެންޓަރުތަކުގައި ވެކްސިން ދެމުންދެއެވެ.

ހެލްތް އެމްޖެންސީ އޮޕަރޭޝަން ސެންޓަރުން ވިދާޅުވީ މާލެ ސަރަޙައްދުގައި މިވަގުތު ފުރަތަމަ ޑޯޒް ދިނުން މެދުކަނޑާލާފައިވީނަމަވެސް އަލުން ވެކްސިން ޖެހުމަށް ހުޅުވާލާނެކަމަށާއި، އަދި އެ ތާރީހް ފަހުން އިޢުލާންކުރާނެކަމަށެވެ.

މިމަހުގެ 15 ވަނަ ދުވަހުގެ ފަހުން ވެކްސިންގެ ފުރަތަމަ ޑޯޒް ދިނުން ހުއްޓާލާނެ ކަމަށް އިޢުލާން ކުރުމުން ވެކްސިން ސެންޓަރު ތަކުގެ ކައިރީގައި ދިގު ކިއޫތައް ހެދިއެވެ. އަދި މުއްދަތު ހަމަވީއިރުވެސް ވެކްސިން ޖަހަން ބޭނުންވެފައި ތިބި ގިނަ ބަޔަކަށް ވެކްސިން ނުޖެހޭކަން ކިއޫތަކުން ފާހަގަވެގެން ދިޔައެވެ.

ރާއްޖެއިން މިހާތަނަށް ވެކްސިން ޖެހި މީހުންގެ ޖުމްލަ އަދަދު ވަނީ 218046އަށް އަރާފައެވެ. އޭގެތެރޭގައި ހިމެނެނީ މާލެ ސަރަޙައްދުން 121،630 މީހުންނާއި އަތޮޅުތެރެއިން 96،416 މީހުންނެވެ. ވެކްސިން ޖަހަން ފެށިފަހުން ވެސް ބައްޔަށް ޕޮޒިޓިވްވާ މީހުން މަދު ނުވިނަމަވެސް ގިނަ ބަޔަކު ވެކްސިން ޖެހުމުގެ ސަބަބުން ހޮސްޕިޓަލުގައި އެޑްމިޓްކޮށްގެން ފަރުވާދޭން ޖެހޭ މީހުންނާއި ބަލީގައި ފުރާނައަށް ނުރައްކާވާ ހިސާބަށްދާ މީހުން މަދުކުރެވިފައިވާކަން ކަމާބެހޭ ފަރާތްތަކުން ފާހަގަ ކުރެއެވެ.