ކޯވިޑް-19 ޖެހިގެން މިއަދު ދެވަނަ މީހަކު ނިޔާވެއްޖެއެވެ.

ހެލްތު ޕްރޮޓެކްޝަން އެޖެންސީ، އެޗްޕީއޭއިން ބުނީ މިއަދު ހަވީރު 4:00 ގައި އައިޖީއެމްއެޗް އިމަރޖެންސީއަށް ގެނައި އުމުރުން 86 އަހަރުގެ ދިވެހި ފިރިހެނަކު ނިޔާވެފައިވާ ކަމަށެވެ. އެމީހާ ހޮސްޕިޓަލަށް ގެނައިއިރުވެސް އެއްވެސް ޙަރަކާތެއް ނެތްކަމަށާއި، އެމީހާ މަރުވެފައިވާ ކަމަށް ކަނޑައަޅާފައިވަނީ 4:20 ގައި ކަމަށެވެ.

އެ މީހާއާއެކު ކޯވިޑް-19 ޖެހިގެން ރާއްޖެއިން މަރުވި މީހުންގެ ޖުމުލަ އަދަދު މިހާރު ވަނީ 69 އަށް އަރާފައެވެ. މިއީ މިއަދު ރާއްޖެއިން ކޯވިޑް ޖެހިގެން ނިޔާވި ދެވަނަ މީހާއެވެ.

މިހާތަނަށް ރާއްޖެއިން 26021 މީހަކަށް ކޮވިޑް ޖެހިފައިވާކަމަށް އެޗްޕީއޭގެ ތަފާސް ހިސާބުތަކުން ދައްކައެވެ.