އައްޑޫ މިސްކިތްތަކުގައި ޖަމާޢަތުގައި ނަމާދު ކުރުން ހުއްޓާލައިފިއެވެ.

އައްޑޫ ސިޓީ ކައުންސިލުން ބުނީ އައްޑޫގެ މިސްކިތްތަކުގައި ޖަމާއަތުގައި ނަމާދު ކުރުން ހުއްޓާލަން އިސްލާމިކް މިނިސްޓްރީން އަންގަވާފައިވާ ކަމަށެވެ. މި ފިޔަވަޅު އަޅާފައި ވަނީ މިއަދުން ފެށިގެންނެވެ.

އައްޑޫ ސިޓީގައި މިވަގުތު ކޯވިޑް-19 އަށް ޕޮޒިޓިވް 97 މީހުން އެބަތިއްބެވެ. އެގޮތުން ހިތަދޫ ގައި 27 މީހުން، ފޭދޫ ގައި 6 މީހުން، ހުޅުދޫ ގައި 52 މީހުން އަދި މީދޫގައި ބަލިޖެހިފައިވާ 11 މީހުން އެބަތިއްބެވެ. މީގެ އިތުރުން މަރަދޫފޭދޫ ގައިވެސް ބައްޔަށް ޕޮޒިޓިވް މީހަކު އެބަހުއްޓެވެ.

އޭގެ އިތުރުން އައްޑޫ ސިޓީގައި ހަވީރު 6:00 އިން ފެށިގެން ފަތިހު 4:00 އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާކޮށްފައި ވާތީ، އެ ވަގުތުތަކުގައި ފިހާރަ، ރެސްޓޯރަންޓް، ކެފޭ، ހޮޓާ، އަދި ގާޑިޔާ ފަދަ ތަންތަނުން ޑެލިވަރީ ނުކުރަން މިހާރު ވަނީ އަންގައިފަ އެވެ.

ރާއްޖޭގެ އަތޮޅުތަކުގައި ކޯވިޑް-19 ހަލުވި ދުވެލީގައި ފެތުރެމުން ދާއިރު މިވަގުތުވެސް ރާއްޖޭގެ 48 ރަށެއް ވަނީ ބަންދު ކޮށްފައެވެ. އަދި މި ބަލީގައި މިހާތަނަށް 94 މީހަކު ވަނީ ނިޔާވެފައެވެ.