ކޯވިޑް-19 ގައި މިއަދު ފުލުފުލުގައި ދެމީހުން ނިޔާވެ ރާއްޖެއިން މި ބަލީގައި ނިޔާވި މީހުންގެ ޢަދަދު 131 އަށް އަރައިފިއެވެ.

އެޗްޕީއޭ އިން ބުނީ، ހުޅުމާލެ ކޮވިޑް ފެސިލިޓީގައި ކޮވިޑަށް ފަރުވާ ދެމުން ދަނިކޮށް ރޭ ފަތިހު 4:25 ގައި ނިޔާވެފައިވަނީ ޢުމުރުން 58 އަހަރުގެ ދިވެހި ފިރިހެނެއް ކަމަށެވެ. އަދި ރޭ 2:02 ގައި އައިޖީއެމްއެޗް އީއާރް އަށް ގެނައި ދިވެހި ފިރިހެނެއްވެސް ނިޔާވެފައިވާ ކަމަށާއި، އެއީވެސް ކޮވިޑް މަރެއް ކަމަށެވެ. މިއާއެކު ރާއްޖޭގައި ކޯވިޑް-19 ގައި ނިޔާވި މީހުންގެ އަދަދު ވަނީ 131 އަށް އަރާފައެވެ. މިއީ މިއަދުގެ ދެވަނަ މަރެވެ.

މިމަހުގެ ތެރޭގައި ކޮވިޑްގައި ނިޔާވި މީހުންގެ އަދަދު މިވަނީ 58 އަށް އަރާފައެވެ. އެޗްއީއޯސީން ހާމަކޮށްފައިވާ ގޮތުގައި ރާއްޖޭގައި މިވަގުތު ނަގާ ކޮންމެ ފަސް ސާމްޕަލަކުން 3 މީހުން ދަނީ ބައްޔަށް ފޮޒިޓިވް ވަމުންނެވެ.

ރާއްޖޭގައި ކޮވިޑް ބަލީގައި މަރުވެފައިވާ ޖުމުލަ 131 މީހުންގެ ތެރޭގައި ހިމެނެނީ 116 ދިވެހިންނާއި 15 ބިދޭސީންނެވެ. ކޮވިޑުގައި އެންމެ ފުރަތަމަ ރާއްޖެއިން މީހަކު މަރުވީ 2020 ވަނަ އަހަރުގެ އޭޕްރީލް މަހުގެ 29 ވަނަ ދުވަހުއެވެ. އެއީ އުމުރުން 83 އަހަރުގެ ދިވެހި އަންހެނެކެވެ.