ބ. އޭދަފުށިން ކޯވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު 259 އަށް އަރައިފި ކަމަށް ބ. އަތޮޅު ހޮސްޕިޓަލުން ހާމަކޮށްފިއެވެ.

ބ. އަތޮޅު ހޮސްޕިޓަލުން އާންމުކޮށްފައިވާ ތަފާސް ހިސާބުތައް ދައްކާގޮތުން އެރަށުގައި މިވަގުތު ބައްޔަށް ޕޮޒިޓިވް ވެފައިވާ 64 މީހުން އެބަތިއްބެވެ. އެރަށުން 1919 އަށްވުރެ ގިނަ ސާމްޕަލް ނަގާފައިވާއިރު، މިވަގުތު ނަތީޖާ ނުލިބޭ ސާމްޕަލެއް ނެތެވެ. އަދި މިވަގުތު ކޮވިޑް ފެސިލިޓީގައި އެކަކަށް ދަނީ ފަރުވާދެމުންނެވެ.

ބ. އަތޮޅު ހޮސްޕިޓަލުން ބުނީ ޕޮޒިޓިވްވި މީހުންގެ ތެރޭގައި ގިނައީ ޕޮޒިޓިވްވި މީހުންނާ ކޮންޓެކްޓްވިކަމަށް ބެލެވިގެން ޓެސްޓް ހެދި މީހުންކަމަށެވެ. އަދި މިހާރުވެސް އިތުރު ސާމްޕަލް ނެގުމުގެ މަސައްކަތް ކުރަމުންދާކަމަށް އެހޮސްޕިޓަލުން މައުލޫމާތުދެއެވެ. އޭދަފުށިން މިބަލި ޖެހުމަށްފަހު 195 މީހަކު ވަނީ ބަލިން ފަސޭހަވެފައެވެ. އެރަށުން މި ބަލީގައި ނިޔާވެފައިވަނީ އެންމެ މީހެކެވެ.

އޭދަފުށީގެ ތިންހާސް މީހުންގެ އާބާދީގެ ތެރޭގައި ކޯވިޑް ފެތުރެމުންދާއިރު، އެ އަތޮޅުގެ ބައެއް އެހެން ރަށްރަށުންވެސް ކޯވިޑްގެ ކޭސްތައް ދަނީ ފެންނަމުންނެވެ. އެގޮތުން އެއަތޮޅުގެ ތުޅާދޫގައިވެސް މިވަގުތު ބައްޔަށް ޕޮޒިޓިވް 50 މީހުން އެބަތިއްބެވެ. އެޗްޕީއޭ އިން މިހާރު ވަނީ ޚާއްސަ ފިޔަވަޅުތަކަކާއެކު އޭދަފުށީގައި ކާފިއު އިޢުލާނު ކޮށްފައެވެ.