ރަޝިއާގެ ސްޕުޓްނިކް ވެކްސިންގެ ދެ ލައްކަ ޑޯޒް ވެކްސިނަށް އޯޑަރު ދޭން ނިންމާފައިވާ ކަމަށް ރައީސް އިޢުލާނު ކުރަށްވައިފި އެވެ.

މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވީ، ދުނިޔޭގައި ގިނައީ ކޯވިޑް ވެކްސިންގެ އެންމެ ޑޯޒެއްވެސް ނުލިބޭ ގައުމުތައް ކަމަށާއި އެހެން ނަމަވެސް ރާއްޖޭގެ އާބާދީގެ 69 ޕަސެންޓަށް ވެކްސިންގެ ފުރަތަމަ ޑޯޒް ޖެހިފައިވާ ކަމަށެވެ.

މިރޭގެ ނޫސްވެރިންގެ ބައްދަލުވުމުގައި ހެލްތް މިނިސްޓަރ އަޙްމަދު ނަސީމް ވިދާޅުވީ، ރަޝީއާ ވެކްސިންގެ ދެލައްކަ ޑޯޒްގެ އެގްރީމެންޓް ވަނީ ލިބިފައިކަމަށާއި، އެކަން ވަރަށް އަވަހަށް ހަމަޖެހި އެގްރީމެންޓްގައި ސޮއި ކުރެވޭނެ ކަމަށް އުންމީދު ކުރަށްވާ ކަމަށެވެ. އަދި އެގްރީމެންޓްގައި ސޮއި ކުރެވޭތާ 4 ހަފްތާ ތެރޭގައި ވެކްސިން ލިބޭނެ ކަމަށް މިނިސްޓަރ ވިދާޅުވިއެވެ.

މިހާރު ރާއްޖެއިން އޯޑަރ ދީފައިވާ އެސްޓްރާޒެނިކާ ވެކްސިން ޖޫން މަހުގެ ފަހުކޮޅު ލިބޭނެކަމަށް އުންމީދު ކުރަށްވާ ކަމަށާއި، މިހާރު ވެކްސިން ލިބުމުގައި ލަސްވެފައިވަނީ ދަތުރުފަތުރު ކުރުމުގައި ހުރި ދަތިކަމުގެ ސަބަބުން ކަމަށް މިނިސްޓަރ ވިދާޅުވިއެވެ.

އިއްޔެއާއި ރޭ ރާއްޖެއިން ނިޔާވި 15 މީހުންގެ ތެރެއިން ވެކްސިން ޖަހާފައި ވަނީ ހަތަރު މީހުން ކަމަށް ހެލްތު މިނިސްޓަރ ވިދާޅުވިއެވެ. އެހެންކަމުން ވެކްސިން ޖެހުމަށް ސަމާލުކަން ދިނުމަށް މިނިސްޓަރ ނަސީމް އިލްތިމާސް ކުރެއްވިއެވެ.

ރާއްޖޭގައި ސްޕުޓްނިކް ވެކްސިން ބޭނުން ކުުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީން ވަނީ ދީފައެވެ. ރާއްޖެއިން މިހާތަނަށް ބޭނުން ކުރަމުން ދަނީ ކޮވިޝީލްޑާއި އެސްޓްރަޒެނިކާއާއި ފައިޒާ އަދި ސިނޯފާމް ވެކްސިނެވެ.