ހިޔާ ފްލެޓްތަކުގެ ލޯނު ދައްކާ ނިމޭއިރު 3.2 ބިލިއަން ރުފިޔާ ދައްކަން ޖެހެނީ ސަރުކާރުން ކަމަށް ރައީސް ޞާލިޙް ވިދާޅުވެއްޖެއެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވީ ހިޔާ ފްލެޓްތަކުގެ ލޯނު ދައްކާ ނިމޭއިރު 3.2 ބިލިއަން ރުފިޔާ ދައްކަން ޖެހެނީ ސަރުކާރުން ކަމަށާއި އެއީ ވަރަށް ބޮޑު ބުރައެއް ކަމަށެވެ.

ރައީސް ވިދާޅުވީ، ހިޔާ ފްލެޓެއްގެ އަގު ކުރިން ހެދިގޮތުން ފްލެޓެއްގެ އަގު 1.2 މިލިއަން ރުފިޔާ އަށް އަރާ ކަމަށެވެ. އޭރުން މަހަކު 10،000ރ. އަށް ވުރެ ބޮޑު އަދަދެއް 20 އަހަރު ވަންދެން ދައްކަން ޖެހޭކަން ރައީސް ފާހަގަކުރެއްވިއެވެ. ރައީސް ވިދާޅުވީ ސަރުކާރުން އަގުތަށް ރިވައިޒް ކުރީ އެއީ ބޮޑު އަދަދެއް ކަމަށް ގަބޫލު ކުރެވޭތީ ކަމަށެވެ.

އެގޮތުން ފައިސާ ދައްކަންޖެހޭ މުއްދަތަށާއި ޕަސެންޓްތަކަށް ގެނައި ބަދަލާ އެކު މިހާރު ވަރަށް ބޮޑަށް ރައްޔިތުން ދައްކަންޖެހޭ ޢަދަދު ކުޑަކުރެވިފައި ވާކަމަށް ރައީސް ވިދާޅުވިއެވެ. އެގޮތުން ބިމުގެ ކުއްޔާއި، މެނޭޖްމަންޓް ފީއަށް ކެނޑުމަށްފަހު އަލުން ހިސާބު ހެދުމުން ޔުނިޓެއްގެ އަގު 1 މިލިޔަން ރުފިޔާއަށް ކުޑަކުރެވުނުކަމަށް ރައީސް ވިދާޅުވިއެވެ. އަދި އިންޓްރެސްޓެ ރޭޓު 6 އިންސައްތައަށް ކުޑަކޮށް ޕޭމަންޓް ދައްކަން ޖެހޭ މުއްދަތެއްގެ ގޮތުގައި 25 އަހަރުދުވަސް ހެދުމުން 7500 ރުފިޔާއަށް އަގު ކުޑަވާނެކަމަށް ރައީސް ވިދާޅުވިއެވެ. ނަމަވެސް މިހާރުވެސް ލޯނު ދައްކާ ނިމޭއިރު 3.2 ބިލިއަން ރުފިޔާ ދައްކަން ޖެހެނީ ސަރުކާރުން ކަމަށް ރައީސް ވިދާޅުވިއެވެ.

ރައީސް ވިދާޅުވީ، މާލޭގެ ބޯހިޔާވަހިކަމަށް 1000 ހައުސިންގ ޔުނިޓުގެ ޢަމަލީ މަސައްކަތް މިހާރު ފެށިފައިވާކަމަށާއި 6000 ހައުސިންގ ޔުނިޓް ގެ މަސައްކަތް 3 ފަރާތަކަށް ހަވާލުކުރެވިފައިވާ ކަމަށާއި އަދި މީގެ އިތުރުން އިތުރު 4000 ޔުނިޓް އެޅުމަށް މަސައްކަތްތެރިން ހޯދުމަށް އިޢުލާން ކުރެވިފައިވާކަމަށެވެ. މި ސަރުކާރުން ހަދާ ދެ ކޮޓަރީގެ ފުލެޓު 47000 ޑޮލަރަށް އަދި ތިން ކޮޓަރީގެ ފުލެޓު 65000 ޑޮލަރަށް ދިގު މުއްދަތަކަށް ލޯނު ދައްކާ އުސޫލުން ރައްޔިތުންނަށް ފޯރުކޮށްދޭނެ ކަމަށް ވެސް ރައީސް މިއަދު ވިދާޅުވިއެވެ.

ހިޔާ މަޝްރޫޢުތަކުގެ އަގުގެ މައްސަލާގައި އެޗްޑީސީން ބުނެފައިވަނީ ފުލެޓުތަކަށް ފައިސާ ދައްކާ ޚަލާސްކުރުމަށް ހަމަޖެހިފައިވަނީ 25 އަހަރަށް ބަހާލައިގެން، އިންސްޓޯލްމަންޓުގެ ގޮތުގައި މަހަކު 7500ރ ދައްކާގޮތަށް ކަމަށެވެ. އަދި ފުލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު 1،000ރ. ނަގާގޮތަށް ހަމަޖެހިފައިވާ ކަމަށް އެޗްޑީސީން ބުނެފައިވެއެވެ.

އެހެން ނަމަވެސް ފުލެޓު އެއްބަސްވުމުގައި ސޮއިކުރާ ތާރީޚުން ފެށިގެން ތިން މަސްދުވަހުގެ މުއްދަތަކީ އެއްވެސް ފައިސާއެއް ދައްކަންނުޖެހޭ ގޮތަށް ސަރުކާރުން ކަނޑައަޅާފައިވާ ކަމަށް އެޗްޑީސީން ބުނެފައިވެއެެެވެ. އެޗްޑީސީން ބުނީ މި ފުލެޓުތަކަށް ޑައުންޕޭމަންޓުގެ ގޮތުގައި އެއްވެސް ފައިސާއެއް ނެގުމަށް ހަމަޖެހިފައިނުވާކަމަށެވެ. ނަމަވެސް އެއްވެސް ފަރާތަކުން ޑައުންޕޭމަންޓުގެ ގޮތުގައި ފައިސާ ދައްކަން ބޭނުންވާނަމަ އެ ފަރާތަކަށް އެ އިންތިޒާމު ހަމަޖައްސައިދެވޭނެ ކަމަށާއި އަދި، ފައިސާ ދައްކަން ކަނޑައެޅިފައިވާ މުއްދަތު ކުޑަކުރަން ބޭނުންވާ ފަރާތްތަކަށް އެ ފުރުޞަތުވެސް ދެވޭނެކަމަށް ވެސް އެޗްޑީސީން ބުނެފައިވެއެވެ.