އެއްވެސް ކައުންސިލަރަކަށް ބިރު ދައްކާފައެއް ނުވާނެ ކަމަށް ވިލިމާލޭ ދާއިރާގެ ކައުންސިލް މެންބަރު ނަހުލާ ޢަލީ ވިދާޅުވެއްޖެއެވެ.

ސިޓީ ކައުންސިލުން ބުނީ، ކައުންސިލަރުންގެ ރަސްމީ މަސްއޫލިއްޔަތުތަކުގެ ދަށުން ކުރަންޖެހޭ ކަންކަން ކުރުމަށް ވިލިމާލެއަށް ދިއުމުން، ވިލިމާލެ ކައުންސިލަރު ނަހުލާ ޢަލީ ވިދާޅުވެގެންކަމަށް ބުނެ ބަޔަކު ބިރުދައްކާ، މަސައްކަތަށް ހުރަސް އަޅާފައިވާ ކަމަށެވެ. އެހެންކަމުން އެކަން ހިނގައިދިޔަ ގޮތް ބަލައި، ފިޔަވަޅު އެޅުމަށް އެދި އެލްޖީއޭއަށް ހުށަހަޅާފައިވާކަމަށް ސިޓީ ކައުންސިލުން ބުނެއެވެ.

އެ މައްސަލައާ ގުޅޭގޮތުން ނަހުލާ ކުރެއްވި ފޭސްބުކް ޕޯސްޓެއްގައި ވިދާޅުވީ ކައުންސިލަރުންތަކެއް ވިލިމާލެއަށް ވަޑައިގެންނެވި ކަމަށް ބުނާ ދުވަހު އޭނާ ހުންނެވީ ސަލާމުގައި ކަމަށާއި ކައުންސިލަރުންތަކެއް ވަޑައިގަންނަވާ ކަމެއް އަދި ކަމާ ގުޅޭ މައުލޫމާތު މޭޔަރު ޑރ. މުހައްމަދު މުއިއްޒު ހިއްސާކުރައްވާފައިވެސް ނުވާ ކަމަށެވެ. އެހެންކަމުން ވަޑައިގެންނެވީ ކޮންބޭފުޅުންނެއް ކަމެއް އަދި ކައުންސިލަރުންތަކެއް ވަޑައިގަންނަވާ ކަމެއް އެނގިފައިނުވާ ކަމަށް ވެސް އޭނާ ވިދާޅުވިއެވެ.

ނަހުލާ ވިދާޅުވީ، ދާއިރާގެ ރައްޔިތަކު ލައްވައި އެއްވެސް މީހަކަށް ބިރު ދައްކައިފައި ނުވާނެ ކަމަށެވެ. އަދި ވިލިމާލެ ދާއިރާގެ ރައްޔިތަކު ބިރު ދެއްކުމުގެ އަމަލެއް ހިންގައިފާނެ ކަމަށް ވެސް ގަބޫލް ނުކުރާކަމަށް އޭނާ ވިދާޅުވިއެވެ.

ސިޓީ ކައުންސިލުން ބުނީ މިމައްސަލަ ހުށަހެޅީ އެމްޑީޕީގެ ކައުންސިލަރ މަރިޔަމް ރީހާންކަމަށާއި، ތާއީދުކުރެއްވީ ޑެޕިއުޓީ މޭޔަރ އަހުމަދު ނަަރީޝްކަމަށެވެ. އަދި މިހުށަހެޅުން ކައުންސިލުގެ އަޣުލަބިއްޔަތުން ފާސްވެފައިވާކަމަށް ސިޓީ ކައުންސިލުން ބުނެފައި ވެއެވެ.

މާލެ ސިޓީ ކައުންސިލަރުންގެ މަސައްކަތަށް ވިލިމާލެ ކައުންސިލަރު ހުރަސް އަޅައި، ބިރު ދައްކާކަމަށް ބުނެ، އޭނާއާ މެދު ފިޔަވަޅު އަޅައިދިނުމަށް އެދި ސިޓީ ކައުންސިލުން ލޯކަލް ގަވަރމަންޓް އޮތޯރިޓީއަށް ހުށަހަޅާފައިވާއިރު، މީގެކުރިންވެސް ބައެއް ކައުންސިލަރުން ވަނީ މިމައްސަލަ ފެންމަތިކޮށްފައެވެ.