މިއަހަރުގެ ދެވަނަ ކުއާޓަރުގައި އެމްޓީސީސީއަށް ސާފު ފައިދާގެ ގޮތުގައި 63 މިލިއަން ރުފިޔާ ލިބިއްޖެއެވެ.

އެމްޓީސީސީ އިން ޢާއްމުކޮށްފައިވާ މިއަހަރުގެ ދެވަނަ ކުއާޓާގެ މާލީ ހިސާބުތައް ދައްކާގޮތުން މި ކުއާޓާގައި އެކުންފުނިން ކޮށްފައިވަނީ 423.32 މިލިއަން ރުފިޔާގެ ވިޔަފާރިއެވެ. މިއަހަރުގެ ފުރަތަމަ ކުއާޓާގައި އެ ކުންފުނިން ކޮށްފައިވަނީ 423.01 މިލިއަން ރުފިޔާގެ ވިޔަފާރިއެވެ. ޓެކުހަށް ކެނޑުމުގެ ކުރިން އެމްޓީސީސީއަށް މިއަހަރުގެ ދެވަނަ ކުއާޓަރުގައި ލިބުނީ 83.08 މިލިއަން ރުފިޔާއެވެ. މިދިޔަ އަހަރުގެ ދެވަނަ ކުއާޓަރުގައި ޓެކުހަށް ކެނޑުމުގެ ކުރިން އެމްޓީސީސީއަށް ލިބިފައިވަނީ 27 މިލިއަން ރުފިޔާ އެވެ.

ޓެކުހަށް ކެނޑުމަށް ފަހު ސާފު ފައިދާގެ ގޮތުގައި މިއަހަރުގެ ދެވަނަ ކުއާޓަރުގައި އެމްޓީސީސީއަށް ލިބުނީ 63.04 މިލިއަން ރުފިޔާއެވެ. މިދިޔަ އަހަރުގެ ދެވަނަ ކުއާޓަރުގައި ސާފު ފައިދާގެ ގޮތުގައި އެކުންފުންޏަށް ލިބުނީ 15 މިލިއަން ރުފިޔާއެވެ.

ޓެކުހަށް ކެނޑުމުގެ ކުރިން އެމްޓީސީސީއަށް މިއަހަރުގެ ފުރަތަމަ ކުއާޓަރުގައި ލިބުނީ 82.32 މިލިއަން ރުފިޔާއެވެ. ޓެކުހަށް ކެނޑުމަށް ފަހު ސާފު ފައިދާގެ ގޮތުގައި މިއަހަރުގެ ފުރަތަމަ ކުއާޓަރުގައި ލިބުނީ 61.68 މިލިއަން ރުފިޔާއެވެ.

މިއަހަރުގެ ދެވަނަ ކުއާޓަރުގައި އެމްޓީސީސީން ވަނީ 86 މަޝްރޫއެއްގެ މަސައްކަތްކޮށް، ދެ މަޝްރޫއެއްގެ މަސައްކަތް އެއްކޮށް ނިންމާލައިފައެވެ. އަދި ދެވަނަ ކުއާޓާރުގައި އަލަށް ވަނީ 10 މަޝްރޫއެއްގެ މަސައްކަތް ފަށައިފަ އެވެ. އަދި އިތުރު 9 މަޝްރޫޢެއްގެ މަސައްކަތް އެކުންފުންޏާއި ވަނީ ޙަވާލުކޮށްފައެވެ. އެމްޓީސީސީގެ މިކުއާޓާގެ ހިސާބުތައް ދައްކާގޮތުން ކުންފުނީގެ ހިއްސާއަކަށް މި އަހަރުގެ ދެވަނަ ކުއާޓާރުގައި ޖެހުނު ފައިދާ ވަނީ 7.84 ރުފިޔާއަށް އަރާފައެވެ.

އެމްޓީސީސީގެ މާލީ ހިސާބުތައް ދައްކާގޮތުން އެކުންފުނީގައި މަސައްކަތްކުރާ ދިވެހި މުވައްޒަފުންގެ ޢަދަދަކީ 1146 އެވެ. އަދި ބިދޭސީންގެ ޢަދަދަކީ 1341 އެވެ. އެ ކުންފުނީގައި ޖުމްލަ 196 އަންހެން މުވައްޒަފުން ދަނީ މަސައްކަތް ކުރަމުންނެވެ.