ޗައިނާއިން ރާއްޖެއަށް ހަތަރުލައްކަ ޑޯޒް ވެކްސިން ހަދިޔާކުރުމަށް ނިންމާފައިވާ ކަމަށް ޚާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.

އޮންލައިން ނޫހަކަށް މިއަދު ދެއްވި އިންޓަވިއު އެއްގައި ޚާރިޖީ ވަޒީރު ވިދާޅުވެފައި ވަނީ، ޗައިނާއިން 4 ލައްކާ ޑޯޒް ވެކްސިން ފޯރުކޮށްދޭނެ ކަމުގެ ޔަޤީންކަން ޗައިނާގެ ރައީސް ޝީ ޖިންޕިން ރައީސް އިބްރާހީމް މުޙައްމަދު ޞާލިޙަށް ދެއްވާފައިވާ ކަމަށެވެ. އަދި އެ ވެކްސިން ވަރަށް އަވަހަށް ލިބޭނެ ކަމަށް ޝާހިދު ވިދާޅުވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޗައިނާގެ ރައީސް ޝީ ޖިންޕިންގއަށް ފޯނުން ގުޅުއްވައި ބޭއްވެވި މަޝްވަރާތަކުގައި ޗައިނާގެ ރައީސް ވަނީ ކައިރި މުސްތަޤްބަލެއްގައި ޗައިނާއިން ރާއްޖެއަށް އިތުރު ވެކްސިން ހަދިޔާކުރުމަށް ނިންމަވާފައިވާކަން ހާމަކުރަށްވާފައެވެ. އޭގެ އިތުރުން ޑެޕްޓް ސަރވިސް ސަސްޕެންޝަން އިނީޝިއޭޓިވް (ޑީ.އެސް.އެސް.އައި) އަށް އެހީ ތެރިވެދިނުމަށް ނިންމަވާފައިވާކަމަށާއި، މިކަމުގެ ސަބަބުން ރާއްޖެއަށް ކޯވިޑް-19 ގެ ހާލަތުން އަރައިގަތުމަށް އެހީއަކަށް ވެގެންދިއުމަށްވެސް އުންމީދުކުރައްވާކަމުގައި ވެސް ޗައިނާގެ ރައީސް ވަނީ ވިދާޅުވެފައެވެ.

މީގެ ކުރިން ހެލްތު މިނިސްޓަރ އަޙްމަދު ނަސީމް ވިދާޅުވެފައިވަނީ، ރާއްޖެއިން އެސްޓްރާޒެނަކާ ސިންގަޕޫރާއެކު ހެދި އެއްބަސްވުމުގެ ދަށުން ގެންނަ 700،000 ޑޯޒް ވެކްސިންގެ ތެރެއިން 500،000 ޑޯޒް މިމަހުގެ ފަހުކޮޅު ލިބޭނެކަމަށެވެ. އޭގެ އިތުރުން ރަޝިޔާ އިންވެސް 200،000 ޑޯޒް ވެކްސިން ގެނައުމަށްވެސް ސަރުކާރުން ދަނީ މަސައްކަތް ކުރަމުންނެވެ.

ޗައިނާއިން ވަނީ، ދިވެހިރާއްޖެއަށް މިދިޔަ މާރިޗު މަހު 200،000 ޑޯޒް ސިނޯފާމް ވެކްސިން ހަދިޔާ ކޮށްފައެވެ. އޭގެ އިތުރުން ރާއްޖެއަށް ލިބިފައިވަނީ ކޮވިޝީލްޑުގެ 300،000 ޑޯޒެވެ. އެއީ އިންޑިޔާ ސަރުކާރުން ހަދިޔާކުރި 200،000 ޑޯޒާއި، އިންޑިޔާގެ ސީރަމް އިންސްޓިޓިއުޓުން ގަތުމަށް އެއްބަސްވި 300،000 ޑޯޒުގެ ތެރެއިން 100،000 ޑޯޒެވެ. މީގެއިތުރުން ރާއްޖޭގައި ދެން ޖަހަމުން ގެންދަނީ ފައިޒާ ވެކްސިނެވެ.