މާލޭ ސިޓީ ކައުންސިލުން ގަރާޖުތަކާއި، ގަރާޖު އެއްބަސްވުންތައް ޗެކް ކުރުމުގެ މަސައްކަތް ފަށައިފިއެވެ.

މާލޭ ސިޓީ ކައުންސިލުން ކޮށްފައިވާ އިޢުލާނެއްގައި ބުނެފައިވަނީ، މާލޭ ސަރަހައްދުގައި ރަޖިސްޓަރީ ކުރާ އުޅަނދުތައް ރަޖިސްޓަރީ ކުރުމަށްޓަކައި ގަވާއިދުގައި ބަޔާންކޮށްފައިވާ އުޅަނދު ބާއްވާނެ ގަރާޖު ޗެކް ކުރުމާއި، ގަރާޖުގެ ވެރިފަރާތާއި އުޅަނދުގެ ވެރިފަރާތާ ދެމެދު ވެވޭ އެއްބަސްވުމުގެ ސައްޙަކަން ކަށަވަރުކުރުމުގެ މަސައްކަތް މިއަދުން ފެށިގެން މާލޭ ސިޓި ކައުންސިލުން ކުރާގޮތަށް ޓްރާންސްޕޯޓް އޮތޯރިޓީން ބަދަލުކުރައްވާފައިވާތީ، މިއަދުން ފެށިގެން މާލެއާއި ހުޅުމާލޭގައި ރަޖިސްޓަރީ ކުރާ އުޅަނދުތައް ރަޖިސްޓަރީ ކުރުމަށްޓަކައި ގަރާޖު ޗެކް ކުރުމާއި، ގަރާޖުގެ ވެރިފަރާތާއި އުޅަނދުގެ ވެރިފަރާތާ ދެމެދު ވެވޭ އެއްބަސްވުމުގެ ސައްޙަކަން ކަށަވަރުކުރުމުގެ މަސައްކަތް މާލޭ ސިޓީ ކައުންސިލުން ކުރާގޮތަށް ހަމަޖައްސާފައިވާކަމަށެވެ.

މީގެ ކުރިން މާލޭ ސިޓީގެ މޭޔަރ ޑރ. މުޙައްމަދު މުއިއްޒު ވިދާޅުވެފައިވަނީ، މާލޭ ސިޓީގައި ރަޖިސްޓްރީކުރާ އުޅަނދުތައް ރަޖިސްޓްރީކުރުމަށްޓަކައި ގަވައިދުގައި ބަޔާންކޮށްފައިވާ އުޅަނދު ބާއްވާނެ ގަރާޖް ޗެކްކުރުމާއި ގަރާޖްގެ ވެރިފަރާތާއި އުޅަނދުގެ ވެރިފަރާތާއި ދެމެދު ވެވޭ އެއްބަސްވުމުގެ ސައްޙަކަން ކަށަވރުކުރުމުގެ މަސައްކަތް މާލޭ ސިޓީ ކައުންސިލަށް ބަދަލުކުރިކަން މޯލްޑިވްސް ޓްރާންސްޕޯޓް އޮތޯރިޓީ އިން އިއުލާންކުރީ ސިޓީ ކައުންސިލްގެ މަޝްވަރާއެއްނެތިކަމަށެވެ.

ސިޓީ ކައުންސިލުން މިއަދު ބުނެފައިވަނީ، މި ޚިދުމަތައް އެދިވަޑައިގަންނަވާ ފަރާތްތަކުން އެކަމާއި ގުޅޭ ފޯމް އިއްޒުއްދީންމަގު ރާވެރިބޭ ފުޑްކޯޓްތައް ކުރިމަތިގައި ހުންނަ މާލެ ސިޓީ ކައުންސިލްގެ ލޭންޑް އެންޑް ބިލްޑިންގް ސެކްޝަންގެ ރިސެޕްޝަން، އަދި ސިޓީ ކައުންސިލްގެ ހުޅުމާލޭ ސެކްޝަން

( އެޗް.ޑީ.ސީ ބިލްޑިންގ 1 ވަނަ ފަންގިފިލާ) އަށް ހުށަހެޅުމަށް އެދޭ ކަމަށެވެ.

ގަރާޖް ހުއްދައިގެ މަސައްކަތްތައް ސިޓީ ކައުންސިލަށް ބަދަލުކުރިކަން ޓްރާންސްޕޯޓް އޮތޯރިޓިން އިޢުލާންކުރީ 12 ޖުލައި 2021 ވަނަ ދުވަހު ގެޒެޓްކުރި އިއުލާނެއްގައެވެ. މި އިޢުލާނާ ގުޅިގެން، މަސައްކަތް ބަދަލުކުރުމުގެ ކަންކަމުގައި މަޝްވަރާކުރަން މަސައްކަތްކުރެއްވިކަމަށާ ނަމަވެސް އެކަމަށް އެދެވޭ ތަރުހީބެއް ލިބިފައިނުވާކަމަށް މޭޔަރ މީގެ ކުރިން ވިދާޅުވިއެވެ.