ވެކްސިން ޖަހާފައިނުވާ މީހުންނަށް ކެފޭ ރެސްޓޯރެންޓުތަކުން ހިދުމަތް ނުލިބޭގޮތަށް ހެދުމަށް ސަރުކާރުން މަޝްވަރާ ކުރަން ފަށައިފިއެވެ.

ރާއްޖޭގެ ބައެއް މީޑިއާތަކުން ރިޕޯޓް ކޮށްފައިވާ ގޮތުގައި ސަރުކާރުން މި ނިންމުމަށް އަމަލުކުރަން ފަށާނީ އަންނަ ސެޕްޓެމްބަރު އެއްވަނަ ދުވަހުން ފެށިގެންނެވެ. މި ކަމާއި ގުޅޭ އިތުރު މައުލޫމާތެއް ރަސްމީ އެއްވެސް އިދާރާއަކުން އަދި ހާމައެއްނުކުރެއެވެ.

ރާއްޖޭގައި ކޯވިޑްގެ ހާލަތު ނިއު ނޯމަލް ހާލަތަކަށް ގެނެވިފައިވާކަމަށާއި މިހާޜު އެންމެ މުހިއްމީ ވެކްސިންޖެހޭ އާބާދީއަށް ވެކްސިންޖެހުން ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވަނީ ވިދާޅުވެފައެވެ.

ހެލްތު އިމަޖެންސީ އޮޕަރޭޝަންސް ސެންޓަރުން ވަނީ އިއްޔެއިން ފެށިގެން ސައިހޮޓާ، ކެންޓީން، ކެފޭ، ރެސްޓޯރަންޓު ފަދަ ކާބޯތަކެތީގެ ހިދުމަތްދޭ ތަންތަނުގައި، އާއްމު ޙާލަތާއި އެއްގޮތަށް ކާބޯތަކެތީގެ ހިދުމަތް ދިނުމަށް ހުއްދަ ދީފައެވެ. ރާއްޖޭގައި ކޮވިޑްގެ ހާލަތު ގޯސްވެ، ކާބޯތަކެތީގެ ހިދުމަތްދޭ ތަަންތަން ހުޅުވާފައި ހުންނަ ގަޑިތަކަށް އެކި ދުވަސްތަކުގެ މަތިން ވަނީ ބަދަލު ގެނެސްފައެވެ. ނަމަވެސް މިއީ އާއްމު އުސޫލަކުން އެތަންތަނުން ހިދުމަތްދިނުމުގެ ހުއްދަ ދިން ފުރަތަމަ ފަހަރެވެ.