ކޯވިޑް-19 ވެކްސިން ނުޖަހާނަމަ ކަރަންޓީން މުއްދަތު މުވައްޒަފުންގެ ޗުއްޓީން އުނިވާގޮތަށް ހެދުމުގެ މަޝްވަރާތައް ސަރުކާރުން ފަށައިފިއެވެ.

ސަރުކާރުން މިހާރު ކަނޑައަޅުއްވާފައިވަނީ، ކޮވިޑާ ގުޅިގެން ރަށްރަށަށް ދަތުރުކުރުމަށް ފަހު އަދި ބަލި ޖެހިގެން ނުވަތަ އެ ބަލި ޖެހިފައިވާ މީހަކާ ކޮންޓެކްޓް ވެގެން ކަރަންޓީނު ވާނަމަ މެޑިކަލް ސެޓްފިކެޓެއް ހުށަހަޅަން ޖެހުމަކާ ނުލައި، މުސާރަ ލިބޭ ގޮތަށް، ހާއްސަ ޗުއްޓީއެއް ވަޒީފާދޭ ފަރާތުން ހަމަޖައްސައިދޭން ވާނެކަމަށެވެ.

ނަމަވެސް ވެކްސިން ނުޖަހާ މީހުން އެ އުސޫލުން އިސްތިސްނާ ކުރުމުގެ މަޝްވަރާތައް ޕޮލިސީ ލެވެލްގައި މިހާރު ފަށާފައިވާކަމަށް މަޢުލޫމާތު ލިބިފައިވެއެވެ.

ރާއްޖޭގައި ކޯވިޑްގެ ހާލަތު ނިއު ނޯމަލް ހާލަތަކަށް ގެނެވިފައިވާކަމަށާއި މިހާރު އެންމެ މުހިއްމީ ވެކްސިންޖެހޭ އާބާދީއަށް ވެކްސިންޖެހުން ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވަނީ ވިދާޅުވެފައެވެ.

އެޗްޕީއޭ އިން އެންމެ ފަހުން ހާމަކޮށްފައިވާ ގޮތުގައި، ސެޕްޓެމްބަރު 1 ވަނަ ދުވަހުގެ ފަހުން، ވެކްސިން ނުޖަހައި ދަތުރުކުރާ ފަރާތްތަކުގެ ރިލީޒް ސާމްޕަލް ދެން ހިލޭ ހަދައި ނުދޭނެއެވެ. އަދި ބަލި އުޅޭ ރަށަކުން ވެކްސިންގެ ޑޯޒްތައް ފުރިހަމަ ނުކޮށް ދަތުރުކުރާ ނަމަ ކަރަންޓީންވާން ޖެހޭ ޖެހުމަށް ބަދަލެއް ނާންނާނެ ކަމަށާއި، ކަރަންޓީނު ވުމަށް ފަހު ނަގާ ރިލީޒް ސާމްޕަލް ދެން ނެގޭނީ އަމިއްލަ ޚަރަދުގައި ކަމަށް ވަނީ ނިންމަވާފައެވެ.

ސަރުކާރުން ވަނީ ރާއްޖޭގެ މުޅި އާބާދީއަށް ވެކްސިން ޖެހުމުގެ ޤައުމީ ބޮޑު ކެމްޕެއިނެއް ފަށާފައެވެ. އަދި މި ކެމްޕޭންގެ އަމާޒަކީ މިއޮގަސްޓު މަހުގެ ނިޔަލަށް ވެކްސިން ޖެހޭ އާބާދީގެ 90 އިންސައްތަ މީހުންނަށް ވެކްސިން ޖެހުން ކަމަށް ސަރުކާރުން ވަނީ ހާމަކޮށްފައެވެ. ސަރުކާރުން ބުނެފައިވަނީ، ރާއްޖޭގައި ވެކްސިން ޖެހޭ އާބާދީގެ 27 ޕަސެންޓް މީހުން ވެކްސިންގެ އެއްވެސް ޑޯޒެއް ނުޖަހާ އެބަތިބި ކަމަށެވެ.